МКС: Барања за апсење на Нетанјаху и лидерот на Хамас
20 мај 2024
Главниот обвинител на Меѓународниот кривичен суд (МКС) поднесе барање за издавање налози за апсење на израелскиот премиер Бенјамин Нетанјаху и лидерот на терористичката организација Хамас во Појасот Газа, Јахја ал Синвар, соопшти судот во понеделникот во Хаг.
Главниот обвинител Карим Кан ги гони злосторствата за време на војната во Појасот Газа. Според соопштението на МКС, Кан планира дополнителни налози за апсење против израелскиот министер за одбрана Јоав Галант и заменикот на Синвар, Мохамед Деиф, како и против шефот на Хамас за надворешни работи Исмаил Ханија. Обвинителот ги обвинува лидерите на Хамас дека се одговорни меѓу другото, за „истребување“ како и убиство, земање заложници, силување и тортура како злосторство против човештвото.
На израелскиот премиер Нетанјаху и министерот за одбрана Галант им се става на товар меѓу другото, користење на изгладување на цивили како метод на војување и самоволни убиства и насочени напади на цивили.
Дали бараните меѓународни потерници ќе бидат издадени, ќе одлучат судиите на МКС.
Израелската влада неодамна изрази загриженост за можно кривично гонење на израелски претставници. Нетанјаху на платформата X напиша дека Израел под негово водство „никогаш нема да прифати обид на Кривичниот суд да го поткопа легитимното право на Израел на самоодбрана". Нетанјаху предупреди од „опасен преседан“, со кој се „загрозуваат војниците и претставниците на сите демократии кои се борат против бруталниот тероризам и безмилосни агресии“.
Судот фактички нема можности за реализирање на издадени налози за апсење, но сепак на тој начин силно се ограничува слободата на движење на бараните лица. Зашто, налог за апсење ги обврзува државите кои се потписнички на Меѓународниот кривичен суд, да ги уапсат лицата по кои е издадена потерница и да му ги предадат на Судот ако се нашле на нивна територија.
При нападот на Хамас на израелската погранична област на 7 октомври беа убиени околу 1200 луѓе и земени како заложници повеќе од 250 лица кои беа одвлечкани во Појасот Газа. Нападите за реакција имаа воена офанзива на Израел во Појасот Газа, во која според наводите на Министерството за здравство, контролирано од Хамас, досега загинале повеќе од 35 400 луѓе.