Дронови на аеродромот во Минхен
3 октомври 2025
Летовите на аеродромот во Минхен вчеравечер (2.10) беа прекинати поради забележани беспилотни летала. Според информации од аеродромот, откажани биле 17 летови, што влијаело на речиси 3.000 патници. Покрај тоа, 15 пристигнати летови морале да бидат пренасочени кон Штутгарт, Нирнберг, Виена и Франкфурт.
Голем број од заглавените патници мораа да ја поминат ноќта на аеродромот. Полицијата и противпожарната служба на аеродромот за оваа намена поставија десетици камп-кревети во терминалот. Во меѓувреме сообраќајот се одвива повторно нормално.
Дронови над аеродромот и околината
Неколку лица пријавиле дека виделе дрон во близина на аеродромот, објави сојузната полиција во текот на ноќта. Подоцна, имало пријави дека дронови се видени и над аеродромот. Дали станува збор за еден или повеќе дронови, засега е нејасно.
Полициски службеници извршија контрола на областа и бараа летачки објекти и осомничени лица, но без успех. Во потрагата учествуваше и полициски хеликоптер.
Минхенскиот аеродром има забрана за ноќни летови за редовен патнички сообраќај помеѓу полноќ и 5:00 часот наутро. Според операторот, во овој период се дозволени само летови за ноќна воздушна пошта и летови од страна на Германската контрола на воздушниот сообраќај.
Во последно време дронови беа видени на повеќе европски аеродроми.