Голем пад на членството во црквите во Германија

Христијанските цркви во Германија и во 2025 година се соочија со значителен пад на членството. Според новите статистики на Германската бискупска конференција и Евангелистичката црква во  Германија  (ЕКД), вкупно околу 1,13 милиони луѓе ја напуштиле Католичката и Евангелистичката црква или починале.

Католичката црква изгуби околу 550.000 членови

Падот продолжува пред сè поради високите бројки на исписи и смртни случаи. Според податоците на Католичката црква,  бројот на верниците  се намалил за околу 550.000 и изнесува 19,22 милиони луѓе, што претставува 23 проценти од вкупното население во Германија.

Во 2025 година регистрирани се 307.117 исписи од Католичката црква – околу 14.000 помалку од претходната година и најниска бројка во последните пет години.

Бискупот Вилмер: „Статистиката е огледало на нашата црква“

Претседателот на Германската бискупска конференција, Хајнер Вилмер, изјави дека годишната статистика е „огледало на нашата црква“. Тој посочи дека е охрабрувачки фактот што бројот на присутни на богослужби благо се зголемил, а бројките за прва причест и миропомазание останале стабилни. Сепак, тој изрази жалење поради и понатаму високото ниво на исписи.

Евангелистичката црква со уште поголем пад

Евангелистичката црква исто така продолжува да се намалува.  Бројот на верници  во ЕКД се намалил за околу 580.000, на приближно 17,4 милиони луѓе.

Бројот на исписи останал речиси непроменет во однос на претходната година и изнесувал околу 350.000 лица, покажуваат податоците на Евангелистичката црква.