Дрска кражба во Лувр: Украден кралски накит сред бел ден

Крадци вооружени со електрични алати го ограбија Лувр во неделата, одземајќи дел од бесценетиот кралски накит на Франција во дрска кражба што траела само седум минути и се случила сред бел ден, соопштија официјални лица и извори.

Властите пронајдоа круна од 19 век украсена со скапоцени камења – оштетена – во близина на музејот, но сторителите сè уште се во бегство и предмет на полициска потера.

Спектакуларната кражба, една од неколкуте што ги таргетираа француските музеи во последните месеци, го принуди Лувр – најпосетуваниот музеј во светот и дом на Мона Лиза – да ги затвори вратите за остатокот од денот.

Воени патроли беа распоредени околу познатиот стаклен пирамидален влез, додека полициски тимови беа забележани како влегуваат во музејот. Евакуираните посетители, туристи и минувачи беа држени на дистанца зад полициска лента.

„Како холивудски филм“, изјави американската туристка Талија Окампо за АФП.

„Лудо“ и „нешто што нема да го заборавиме – не можевме да влеземе во Лувр затоа што се случи грабеж“, рече таа.

Крадците користеле електрична, продолжлива скала од типот што се користи за подигнување мебел во згради, за да стигнат до галеријата каде што е изложен кралскиот круниските накит.

Круната на царицата Евгенија, сопруга на Наполеон III, била пронајдена скршена во близина на музејот, изјави извор запознаен со случајот, кој побара да остане анонимен бидејќи не е овластен да зборува за медиумите. 

Круната, украсена со златни орли, е покриена со 1.354 дијаманти и 56 смарагди, според веб-страницата на музејот.

„30 секунди“

Министерот за внатрешни работи Лоран Нунез изјави дека тројца или четворица крадци ја користеле скалата за мебел за да украдат „бесценети“ предмети од две витрини во „Галеријата на Аполон“ во музејот. Засега не е јасно кои други предмети биле одземени.

Во таа галерија обично се изложени и три историски дијаманти – Регент, Санси и Хортенсија – како и ѓердан со смарагди и дијаманти што Наполеон ѝ го подарил на својата сопруга, царицата Мари Луиз.

Крадците пристигнале меѓу 9:30 и 9:40 часот наутро, според изворот запознаен со случајот. Музејот се отворил за јавноста во 9 часот.

Друг полициски извор изјави дека крадците пристигнале со скутер, вооружени со електрични алати, и ја користеле скалата за да влезат во Лувр.

Сведок по име Самир, кој во тој момент возел велосипед во близина, за TF1 изјави дека видел двајца мажи „како се качуваат на скалата, ја кршат прозорската рамка и влегуваат... сето тоа траеше 30 секунди“.

Тој рече дека видел четворица како заминуваат и веднаш ја повикал полицијата.

Дрската кражба се случила само 800 метри од седиштето на париската полиција.

Париското обвинителство соопшти дека отворило истрага, а вредноста на украденото сè уште се проценува.

Лувр на платформата X објави дека е затворен за денот поради „исклучителни причини“.

Серија кражби 

Лувр некогаш бил седиште на француските кралеви, сè до напуштањето на палатата од страна на Луј XIV во доцните 1600-ти. Тоа е најпосетуваниот музеј во светот, кој минатата година примил девет милиони посетители. Луј XIV ја нарачал „Галеријата на Аполон“, која подоцна послужила како модел за Огледалната сала во Версај. Во 1911 година, Мона Лиза била украдена од Лувр. Била пронајдена неколку месеци подоцна и денес се наоѓа зад заштитно стакло.

Неколку француски музеи неодамна беа цел на крадци.

Минатиот месец, криминалци со електричен алат провалиле во Природонаучниот музеј во Париз, одземајќи примероци од злато вредни 600.000 евра (700.000 долари).

Претходно во истиот месец, крадци украле две чинии и ваза од кинески порцелан, класифицирани како национални богатства, од музеј во градот Лимож, со проценета штета од 6,5 милиони евра.

Во ноември минатата година, четворица крадци украле табакери и други вредни артефакти од музејот Конак-Жеј во Париз, кршејќи витрина со секири и бејзбол палки.

Францускиот претседател Емануел Макрон во јануари вети дека Лувр ќе биде „преуреден, обновен и проширен“ откако директорот на музејот изрази загриженост за лошите услови во објектот.

Тој тогаш рече дека се надева оти работите ќе помогнат бројот на годишни посетители да се зголеми на 12 милиони.