„Слаб“ и „ужасен“ - Трамп го критикува папата Лав
13 април 2026
Сега е ред дојде и папата: Доналд Трамп повторно објави една од неговите озлогласени ноќни навредливи објави - овојпат за Лав XIV. Тој наводно е „СЛАБ во однос на криминалот и катастрофа во надворешната политика“. Претходно, поглаварот на католичката црква повеќепати ја критикуваше воената реторика и военото водство на американскиот претседател. „Лав треба да биде благодарен“, му порача Трамп на својата платформа Трут соушал и тврдеше: „Да не бев во Белата куќа, Лав немаше да биде во Ватикан“. Тој додаде: „Тој не беше на ниту една листа на кандидати за папа, а Црквата го стави таму само затоа што е Американец и затоа што сметаа дека тоа е најдобриот начин да се излезе на крај со претседателот Доналд Џ. Трамп“.
„Не сакам папа кој мисли дека е во ред Иран да поседува нуклеарно оружје“, рече американскиот претседател, кој, исто така, ја бранеше својата воена акција против Венецуела и покрај критиките. Според него, таа јужноамериканска земја испратила „огромни количини дрога“, како и „убијци, дилери и криминалци“ во САД.
„А не сакам папата да го критикува претседателот на Соединетите Американски Држави, бидејќи јас го правам токму она за што сум избран со убедлива разлика: постигнувам рекордно ниски стапки на криминал и создавам најдобри резултати на берзата во историјата“.
Трамп го обвини својот сонародник дека си наштетува себеси и на Црквата со својата „млака“ позиција: „Лав треба да се собере како папа, да користи здрав разум, да престане да го кажува она што радикалната левица сака да го слушне и да се фокусира на тоа да биде голем папа, а не политичар“.
Кратко потоа, тој разговараше со новинарите во вената база Џоинт Ендрус, каде што слета со авионот Ер Форс Уан. „Не мислам дека тој работи многу добро“, рече Трамп, додавајќи: „Не сум обожавател на папата Лав“.
Трамп реагира на проповедта на папата
Острите критики на Трамп следеа по проповедта на папата во саботата, во која тој повика на крај на војните. „Доста е војна!“ им рече поглаварот на околу 1,4 милијарди католици ширум светот за време на големиот молитвен митинг за мир во базиликата Свети Петар во Рим. Тој, исто така, упати директен апел до владетелите: „Запрете! Време е за мир!“. Папата зборуваше за „фантазиите за семоќ кои стануваат сè понепредвидливи и поагресивни околу нас“.
Во последно време повиците на папата за мир, вообичаено воздржани, станаа сè поостри, особено поради војната во Иран. Острите закани на Доналд Трамп против Иран Лав - првиот папа од САД - ги осуди на невообичаено директен начин и ги нарече „навистина неприфатливи“.