هغه ښځه او ميړه وپيژنئ چې د کرونا واکسين يې جوړ کړی

اوغور شاهين او ميرمن یې اوزلم توريچي په ۲۰۰۸م کال کې د آلمان په لويديځ ښار ماينس کې د بايو ان ټیک شرکت تاسيس کړ. دا شرکت د فايزر په نامه امريکايي شرکت سره په گډه د واکسين جوړولو يوه تر ټولو مخکښه پروژه پر مخ وړي.

د دې شرکت له خوا تیره اوونۍ دا اعلان چې تر کار لاندې واکسين یې پر انسانانو د آزميښت په دريم پړاو کې د کرونا ويروس پر ضد ۹۰ سلنه اغیزمن دی، په ټوله نړۍ کې د خبرونو په سر ټکو بدل شو او په عين حال کې یې د کرونا پاندمي پر ضد د مبارزې له پاره هیلې را بیدارې کړې. له دې سره په د ونډو په بازار کې د دې شرکت ارزښت هم ډېر لوړ شو.

په دې توگه د بايو ان ټيک شرکت اوس ۲۵،۸ ميليارده ډالر ارزښت لري.

د بايو ان ټیک شرکت اجرايوي رئيس شاهين څلور کلن وو چې آلمان ته راغی او پلار یې د ترکي کارگرانو له هغه نسل څخه وو چې زياتره یې په آلمان کې پاته شول. د شاهين پلار په کلن ښار کې د «فورد» د موټر جوړولو په کارخانه کې کار موندلی وو.

د شاهين ميرمن توريچي چې د بايو ان ټیک د شرکت د طبي برخې مشره ده، د يوه ترکي ډاکتر لور ده چې له استانبول څخه آلمان ته مهاجر شوی وو.

داسې ښکاري چې دا ښځه او مېړه له دې موضوع سره چې د آلمان په ټولنه کې د موافق ادغام د نمونې په توگه ورته وکتل شي، محتاطانه چلن کوي.

شاهين د «گاردين» بريتانوۍ ورځپاڼۍ ته ويلي: «ډاډه نه يم چې واقعاً همداسې څه غواړو. موږ بايد د يوې ټولنې په توگه له ځانه وپوښتو چې څرنگه کولی شو هر چا ته په ټولنه کې د ونډې اخيستلو چانس ورکړو. زه د مهاجرت ريښې لرونکي په توگه يو تصادفي نمونه يم. زه په مساويانه توگه کيدای شوای چې يو آلمانی او يا اسپانوی وای.»

که څه هم چې دا جوړه همدا اوس مشهوره شوې خو په علمي نړۍ کې له اوږدې مودې راهيسې د سرطان په اړه د تحقيق په برخه کې د مخکښو څېړونکو په توگه مشهور دي. دې ښځې او میړه د سرطان د طبابت په برخه کې «انقلابي» تحول خپل هدف گرځولی دی.

۵۵ کلن شاهين چې د ايمونولوژۍ يا د بدن د دفاعي سیسټم د پيژندنې او ماليکولي طب مختصص دی، په لومړي سر کې یې د کلن په پوهنتون کې او بيا وروسته د زارلند په پوهنتون کې زده کړې کړي او په همدې پوهنتون کې یې خپله ميرمن توريچي چې د طب په برخه کې په زده کړو بوخته، پيژندلې وه.

دوی په ۲۰۰۲م کال کې واده وکړ او د واده پر سبا بيرته لابراتوار ته ستانه شول. دوی يوه لور لري.

توريچي ويلي چې له ماشومتوب راهيسې له طبابت سره اړيکي لري. نوموړې يو وخت د آلمان يوې علمي انترنت پاڼې ته ويلي ول: «په کور کې مو د پلار [طبي] کار يوه د معمول خبره وه.» هغې زياته کړې وه چې د طب پرته په بله کومه رشته کې مې د کار تصور نه وو کړی.

شاهين او توريچي په ۲۰۰۱م کال کې د « Ganymed» په نوم د بايو تکنالوژۍ خپل لومړی شرکت جوړ کړ او بيا یې په ۲۰۱۶م کال کې هغه خرڅ کړ.

اړونده موضوع:دوو شرکتونو د کرونا ضد واکسین په جوړولو کې د بې ساري پرمختګ ادعا کړې

د بايوان ټیک په نوم د دوی دويم شرکت د سرطان د ناروغانو د انفرادي درملنې برخې ته پراختيا ورکړه او دا کار یې د هماغه تکنالوژۍ پر بنست کاوه چې اوس د کرونا ويروس ضد واکسين په جوړولو کې یې ترې گټه پورته کړې ده.

دا شرکت چې ۱۵۰۰ کارکوونکي لري، اوس د سترو پانگوالو له خوا ملاتړ کيږي. له دې پانگوالو څخه يې توماس شتروينگمان او ميشايل موچمان په دې وروستيو کې دا جوړه «د باور وړ، درنو، خواري کښو او د بې مثاله ځيرکو کسانو» په توگه ياده کړې وه.

د بايوان ټیک شرکت چې په ماينس ښار کې موقعيت لري، د جنورۍ له لومړۍ نیټې څخه یې د سرطان د درملنې په برخه کې خپل کارونه ځنډولي دي او د کوويد – ۱۹ ناروغۍ پر ضد پر مبارزه یې تمرکز کړی دی.

دې شرکت په مارچ مياشت کې د واکسين جوړولو د خپلو طرحې په مشخصولو سره د امريکايي فايزر شرکت سره په همکارۍ پيل وکړ.

د کرونا واکسين په برخه کې د پرمختگ سره شاهين او توريچي په آلمان کې د ۱۰۰ تر ټولو شتمنو کسانو په نوملړ کې شامل شول.

خو دې جوړې د «گاردين» ورځپاڼې ته ويلي چې تر هغه وروسته چې د واکسين د موثريت په اړه یې خبر ترلاسه کړل، يو څه آرام شول او دا خوښي یې يو څه «ولمانځله»، بيا کښيناستل او يو پياله چای یې وڅښل.

ب.ص/ ن. ز (AFP)

زموږ له آرشيف څخه: