کیف: روسیې د اوکراین پر مهمو تاسیساتو درانه بریدونه کړي
۱۴۰۴ آذر ۱۵, شنبه
پر اوکراین د روسیې د تېرې شپې حملې داسې وخت شوي چې د اوکراین او امریکا مرکچي پلاوی په فلوریدا کې د دریمې پر له پسې ورځې له پاره په اوکراین کې د جګړې د پای ته رسولو له پاره د ترمپ پر طرحه خبرې کوي.
کیف د شنبې په ورځ (د ۲۰۲۵م کال د دسمبر ۶مه) وویل چې د روسیې د دسمبر د ۵مې او ۶مې تر منځ شپې بریدونو کې مهم ځایونه له هغې جملې د انرژۍ تاسیسات او د اورګاډو شبکې په نخښه شوي دي.
د کیف هوايي ځواکونو د شنبې په ورځ وویل چې روسیې تېره شپه پر اوکراین ۵۱ توغندي او ۶۵۳ ډرونونه توغولي دي.
د اوکراین ولسمشر، ولودیمیر زیلنسکي پر ټولنیزې رسنۍ لیکلي: «د دغو بریدونو اصلي اهداف يو ځل بیا د انرژۍ تاسیسات ول. د روسيې هدف دا دی تر څو په میلیونونو اوکراینیانو په کړاو کې واچوي.»
زیلنسکي زیاته کړې چې د تېرې شپې حملو کې د فاستیف ښار د اورګاډو مهم تمځای اور اخیستی دی. فاستیف د کیف جنوب غرب لور ته په شاوخوا ۷۰ کیلومترۍ کې پروت دی.
د اوکراین د اورګاډو دولتي شبکې ويلي په دغو حملو کې ځاني تلفات نه دي اوښتي خو د اورګادو ترافیک مختل شوی دی.
اوکرايني چارواکو دغه راز ویلي چې د روسیې د تېرې شپې بریدونو کې په چرنیهیف، زاپورژيا، لویف او په دنیپروپتروفسک سیمه کې د انرژۍ مهم تاسیسات په نخښه شوي دي. د احیا وزارت ویلي دغو تاسیساتو ته د اوښتو زیانونو له کبله په اودیسه سیمه کې پر ۹۵۰۰ کسانو برېښنا او ۳۴زره نورو د اوبه رسولو خدمات قطع شوي دي.
بل خوا د اتومي انرژۍ نړېوال سازمان د شنبې په ورځ وویل چې تېره شپه د اوکراین د زاپورژیا اټومي بټۍ پر ټولو برخو په موقت توګه برېښنا قطع شوه. زاپورژيا د اروپا تر ټولو ستره اټومي بټۍ ده چې له ۲۰۲۲ راپدېخوا د روسیې تر کنټرول لاندې ده. دغه بټۍ حاضردمه برېښنا نه تولیدوي او د اټومي موادو د سوړ ساتلو او د هغو د ویلي کېدو د مخنيوي په خاطر پر بهرنۍ برېښنا متکي ده.
له آرشیف څخه: