۷۱ نور افغانان له پاکستانه الوتکو کې آلمان ته را انتقال شول
۱۴۰۴ آذر ۸, شنبه
د آلمان حکومت تېره ورځ په داسې حال کې ۷۱ نور افغانان له پاکستانه راانتقال کړل چې د امریکا حکومت د نیویارک د چهارشنبې ورځې (د ۲۰۲۵ کال د نوامبر ۲۶مه نېټه) مرګوني برید وروسته د ټولو افغانانو د مهاجرت دوسیې درولي دي.
د آلمان د کورنیو چارو وزارت یو ویاند د جمعې په ورځ وويل چې دغه ۷۱ افغانان په الوتکو کې د پاکستان له پلازمېنې اسلام آباده د برلین او هانوفر ښارونه ته رسېدلي دي. ویاند وویل چې دغه افغانان د آلمان د منل کېدو فدرالي پروګرام له لارې راانتقال شوي دي.
سربېره پر دې چې صدراعظم فریدریش مېرڅ د مهاجرو شمېر د کمولو له پاره مبارزه کوي، خو د هغه په حکومت کې د ژمنه شوو افغانانو انتقال ادامه لري. د می میاشت راپدېخوا چې د مېرڅ په مشرۍ د آلمان نوی فدرالي حکومت خپل کار پیل کړی، دا لسمه ډله افغانان دي چې د یادو پروګرامونو په چوکاټ کې آلمان ته راانتقاليږي.
د کورنیو چارو وزارت ویاند زیاته کړه چې دغو ټولو ۷۱ کسانو هېواد ته د داخلېدو قانوني ژمنې ترلاسه او د منل کېدو او د امنيتي چک اپ ټول مراحل ېې بشپړ شوي دي.
لا هم په حدود د ۱۹۰۰ نور افغانان په دې هيله د انتظار ژوند تېروي چې د آلمان د منل کېدو مختلفو پروګرامونو له لارې آلمان ته انتقال شي.
په دغو کسانو کې د آلمان پخواني محلي همکاران او د هغوی کورنۍ او همدارنګه د خبریالانو او د بشري حقونو د فعالانو په څېر افراد شامل دي چې وايي په افغانستان کې له خطر سره مخ دي.
هغه افغانان چې د آلمان د منلو پروګرامونو له لارې آلمان ته انتقاليږي اکثریت ېې په پاکستان کې انتظار دي، په داسې حال کې چې د پاکستان حکومت د افغان کډوالو د اخراج پروسه ډېره چټکه کړې ده. پاکستان آلمان ته د روان کال تر پایه وخت ټاکلی چې د دغو افغانانو د انتقال مراحل بشپړ کړي. تر دې مخکې داسې رپوټونه هم ورکړل شوي چې پاکستان ځېنې هغه افغانان هم افغانستان ته اخراج کړي چې د آلمان د منل کېدو په پروګرامونو کې شامل دي.
دغه ۷۱ افغانان په داسې وخت کې آلمان ته رسېدلي چې د واشنګټن د چهارشنبې ورځې د مرګوني برید په سبا د امریکا متحده ایالاتو ولسمشر دونالد ترمپ د «دريمې نړۍ هېوادونو» د امریکا ویزې معطل اعلان کړې. دغه برید چې پکې د امریکا د ملي ګارد دوه غړي وېشتل شوي، تورن عامل ېې یو ۲۹ کلن افغان ښودل شوی.
د ترمپ ادارې تر دغه برید وروسته وویل چې د ټولو افغانانو د پناه غوښتنې دوسیو کارونه به «په موثره او سملاسي توګه» په تعلیق حالت کې راولي.