امريکا ته تخليه سوي افغانان د کور پيدا کولو ستونزې لري

د دوو ماشومانو دغې ۳۴ کلنې مور له خپل مېړه سره په زيلو نومې صفحې کې يو کور ولټاوه په داسې حال کې چې دوی د لاس انجلس په جنوب د ايرواين سيمې يوه هوټل کې ژوند کاوه. هغې ۲۰۰ امريکايي ډلر د اوبر شرکت ټکسۍ له پاره ولګولې څو ۹۰ دقيقې لېرې پروت يو آپارتمان وګوري چې وروسته معلومه شوه چې بل چا نيولی وو. انتظاري نه يوازې د فاميل د څلورو غړو له پاره، بلکې د نورو خپلوانو له پاره هم يوه کور ته اړتيا لري چې ټول ټال اووه تنه کيږي. په پای کې يې دغه لټون څلور مياشتې وخت ونيو. د شنبې په ورځ به دوی د پنځو خونو يوه کور ته کډه کوي چې له لاس انجلس څخه ۸۰ کلومتره سويل ختيځې خوا ته پروت دی. د دغه کور کرايه د مياشتې ۴۰۰۰ ډالره ده.     

د دغې کورنۍ ستونزې نور په لسګونو زره افغانان هم ګالي چې له امريکايي پوځي اډو څخه د متحده آيالاتو ښارونو او کليو ته کډه شوي دي وروسته له دې چې تېر اوړی د تخليې ډراماتيک هوايي عمليات تر سره شوي ول. ډېری هيله لري چې د کليفورنيا په سويل او په واشنګټن ډي سي کې مېشت شي چېرته چې افغانانو پخوا لا د حلالو شيانو د مغازو او د مسجدونو په لرلو سره ځايي ټولنې تاسيس کړې دي. خو دغه ټولنې د امریکا په تر ټولو ګرانو يا قيمتي ځايونو کې پرتې دي. په تېره لوی افغان فاميلونه پراخو سترو کورونو ته ضرورت لري چې اوس کم شوي دي. د بيا مېشتېدنې آژانسونه رپوټ ورکوي چې له موقتي استوګنځايونو څخه لکه هوټلونو، موقتي اير بي ان بي سرپناوو او کليساګانو څخه د کډوالو وتل اوس ډېر وخت نيسي. انتظاري به اوس په خپل کور کې له خپل مېړه، ماشومانو، مور، کشرې خور او ورور او د هغه له فاميل سره په ګډه اوسيږي. بې له کار، د پورونو له رېکارډ او يوه بل امضاکوونکي څخه د هغې په خبره ډېره سخته ده چې سړی يو کور پيدا کړي.

خو بې له کوم آدرسه بيا سخته ده چې دوی کار پیدا کړي او ماشومان يې په ښوونځيو کې داخل شي. انتظاري په فارسي ژبه د يوه ژباړونکي په مرسته وويل چې »زموږ ټول ژوند په يوه کور پورې تړلی دی.«

دوی بايد د دوو مياشتې کرايه ورکړې وای څو دغه کور ونيولی شي چې د داسې يوه سازمان له خوا ورسره مرسته کيږي چې تر راتلونکي کال پورې به د کرايې يوه برخه هم پرې کوي. په داسې حال کې چې متحده آيالات د کرونا له پانديمۍ څخه راوځي، د کورونو بازار نور هم راکوچنی شوی دی، خو افغانان اوس د ځان له پاره کورونه لټوي.

د امريکا متحده آيالاتو ته نيمه برخه افغان کډوال چې ډېری ورڅخه يو څو لسيزې پخوا راغلي دي، د پنځو لويو ښاري مرکزونو په شاوخوا کې ژوند کوي، يعنې واشنګټن، ساکرامېنټو، کليفورنيا، سان فرانسيسکو، نيو يارک او لاس انجلس. دغه خبره د کډوالۍ د پاليسۍ په نوم انستيتوت کوي. په پايله کې دغه سيمې د نويو راغلو افغانانو له پاره هم په زړه پورې دي چې ډېر خلک همېشه د خپلو خپلوانو نومونه اخلي چې دلته ژوند کوي کله چې د بيا مېشتېدنې آژانسونه د هغوی د اوسېدو د ځای په هکله غور کوي. خو په افغانستان کې تېر کال د طالبانو د واکمنېدو راهيسې ۷۶ زره افغانان اوس متحده آيالاتو ته رسېدلي دي. دغه خبره کريش اومارا ويګناراجا کوي چې د لوتېران کډوالۍ د خدماتو د آژانس مشر دی. د هغه په خبره دغه ښارونه نور افغان کډوال نه شي منلی.

آ./ن.ص./ا.ا.