د افغانستان په شمال کې د مرگونې زلزلې ویجاړۍ په انځورونو کي

د طالبانو د ادارې یوه ویاند ویلي دي چې د بلخ، بغلان او سمنگان ولایتونه د هغو سیمو له ډلې څخه دي چې ډیر زیان یې لیدلی دی. د هغه په خبره ډیری ځايي اوسیدونکي د زلزلې د رامنځته کیدو پروخت بیده ول او وې نه سوای کولای چې له خپلو کورونو څخه ووزي.

د طالبانو ادارې ویلي دي چې ژغورونکي ټیمونه له کابل او نورو ولایتونو له مرکزونو څخه له هغو کسانوسره د مرستې له پاره استول سوي دي چې ښايی په غرنیو سیمو کې تر ویجاړیو لاندې بند پاته وي. خپاره سوي انځورونه ښيی چې خلک په ابتدايی وسایلو لکه یوم او کلنگ سره له ویجاړیو څخه د خلکو د ژغورنې په هڅه کې دي.

د طالبانو ادارې له طبیعي پیښو سره د مبارزې د ادارې ویاند، یوسف حماد اعلان کړی دی چې د زلزلې له امله ډیرو زخمیانو سرسري ټپونه لرل او له لومړنیو درملنو وروسته بیرته رخصت سول. همدارنگه د طالبانو د ادارې د دفاع وزارت اعلان کړی دی چې ژغورونکي ټیمونه د نورو ترڅنگ ، د درملنې مرکزونو ته د زخمیانو د انتقال او زیانمنو کورنیو سره د مرستې له پاره بلخ او سمنگان ته تللي دي.

د طالبانو د ادارې د عامې روغتیا وزارت ویاند، شرافت زمان اعلان وکړ چې امکان لري د تلفاتو شمیر زیات سي. دغې زلزلې د بلخ او سمنگان په ولایتونو کې پر ځاني تلفاتو سربیره، ډیر مالي تلفات هم له ځانه پرې ایښي دي. د دغې پیښې د تلفاتو او زیانونو کچه تر اوسه لا معلومه نه ده.

د امریکا متحده ایالاتو د مځکې پیژندنې سازمان اعلان کړی دی چې د دغې زلزلې مرکز د بلخ په شمالي ولایت کې د مځکې په ۲۸ کیلومتره ژوره کې و. د دغې پیښې یو شمیر زخمیان د خلکو او ژغورنې د ټیم په مرسته روغتیايي مرکزونو ته انتقال سوي دي.

د طلوع نیوز د تلویزیوني شبکې له خوا خپاره سوي انځورونه ښيی چې په مزار شریف کې د حضرت علي یا سخي زیارت په نوم مشهور جومات زیانمن سوی دی.

د طالبانو د ادارې ویاند ذبیح‌الله مجاهد، د ایکس پر شبکه یوه پوست کې اعلان وکړ چې زلزلې د بلخ، سمنگان او بغلان ولایتونه لړزولي دي او ځاني او مالي تلفات یې اړولي دي. هغه د خواشینۍ او خواخوږۍ په څرگندولو سره وویل چې اړونده دولتي بنسټونه هڅه کوي ترڅو لازمې مرستې زیانمن سوو کسانو ته ورسوي.

د افغانستان د بریښنا شرکت رپوټ ورکړی دی چې د تیرې شپې زلزلې د بریښنا پايې تخریب کړي او په کابل او څو نورو ولایتونو کې د بریښنا د قطع کیدو سبب سوي دي. دغه شرکت اعلان کړی دی چې هغه دواړې پايې چې له ازبکستان او تاجکستان څخه یې وارداتي بریښنا انتقالوله ، تخریب سوي دي.

په افغانستان کې په وروستیو کلونو کې زلزلې د لنډ وخت په ترڅ او په ډیر شدت سره رامنځته کیږي. د ۲۰۲۳ م کال په وروستیو کې په هرات ولایت کې یوه سخته زلزله له څو نورو کوچنیو زلزلو سره رامنځته سوه چې په نتیجه کې یې، د طالبانو د ادارې د احصایې له مخې ، شاوخوا ۱۲۰۰ کسانو خپل ژوند له لاسه ورکړ او نور په سلونو کسان زخمیان سول.