متقي: ځينې کړۍ د افغانستان او تاجکستان اړيکې خرابول غواړي
۱۴۰۴ دی ۶, شنبه
متقي دا څرګندونې په کابل کې د پخواني شوروي اتحاد د یرغل د ۴۶مې کلیزې په مناسبت یوې غونډې ته وکړې. نوموړي، پرته له دې چې د کوم هېواد یا ډلې نوم واخلي، وویل«ځینې کړۍ هڅه کوي د افغانستان او تاجکستان ترمنځ اړیکې خرابې کړي.»
هغه ټینګار وکړ چې د افغانستان خاوره به د هېڅ هېواد پر ضد ونه کارول شي، خو زیاته یې کړه چې د خپل هېواد پر ضد هر ډول زیان به ونه زغمي.
دا څرګندونې په داسې حال کې کېږي چې په تېره نږدې یوه میاشت کې د افغانستان او تاجکستان ترمنځ پر پوله څو امنیتي پېښې شوي دي.
تاجکستان وايي، په یوه وروستۍ نښته کې یې دوه پولهساتونکي وژل شوي او له طالبانو یې غوښتي چې د پولې د امنیت د ټینګښت لپاره اغېزناک ګامونه واخلي.
د تاجکستان سرحدي ځواکونه د طالبانو حکومت تورنوي چې د پولې د امنیت او د توندلارو ډلو پر وړاندې د مبارزې په برخه کې بېپامي کړې ده.
طالبانو بیا دا تورونه رد کړي او ویلي یې دي چې دغه ډول پېښې د هغو کړیو کار دی چې غواړي په سیمه کې بېثباتي رامنځته کړي.
تاجکستان تر اوسه د طالبانو حکومت په رسمیت نه دی پېژندلی، خو د دواړو لوریو ترمنځ سیاسي تماسونه شته او تېرې میاشتې د تاجکستان یو پلاوی کابل ته تللی و.