وسله والو پېښور کې ۶ امنیتي غړي وژلي او ۸ یې يرغمل کړي
۱۴۰۵ خرداد ۱۹, سهشنبه
د پاکستان يوه امنيتي چارواکي چې د نوم نه بربنډولو په شرط یې د فرانسې له خبري آژانس سره خبرې کولې، وويل چې د پاکستاني طالبانو ډلې يو شمیر غړيو چې په ماشيندارو، لاسي بمونو او هاوان سره په پېښور ښار کې د کنترول پر يوه پوسته هجوم ور وړی وو. دا پېښه د دوشنبې په ورځ رامنځته شوې ده.
يوې بلې امنيتي سرچينې وويل: «د وسله والو په بريد کې د فېدرل کنستبلري (اف سي) شپږ پرسونل شهیدان شوي او څلور نور ټپيان شوي دي.»
اړونده موضوع: پېښور کې د امنيتي ځواکونو پر مرکز ځانمرګي بريدونه شوي
د پاکستان دغه نيمه پوځي مليشې تر ډېره په خيبر پښتونخوا او بلوچستان ایالتونو کې د سرحدونو د امنيت دنده پر غاړه لري.
دې دويمې سرچينې زياته کړې: «وسله والو د اف سي ۸ پرسونل تښتولي او نامعلوم ځای ته یې بیولي دي.»
د پاکستان پوځ په سملاسي توګه پر دې پېښه کومه تبصره نه ده کړې.
اړونده موضوع: خيبر پښتونخوا: په بنو کې پر پوځي اډې ځانمرګي بريد ۱۲ کسان وژلي
د تحريک طالبان پاکستان يا ټي ټي پي ډلې د ټولنیزو رسنيو پر خپله پاڼه باندې د دې تښتول شويو نارينه وو يو عکس نشر کړی او د بريد مسئوليت یې منلی دی.
پاکستان له افغانستان سره پر پوله د مخ پر ودې سختدريځتوب پر ضد مبارزه کوي. د پاکستان حکومت په افغانستان کې واکمن طالبان، وسله والو ته د پناه ځایونو په ورکولو تورنوي خو په افغانستان کې حاکم طالبان دا ډول تورونه په کلکه ردوي.
تېره میاشت وسله والو په خيبر پښتونخوا کې د بېلا بېلو بريدونو په ترڅ کې ۲۶ کسان ووژل.
د پاکستان او طالبانو ترمنځ په دې وروستيو میاشتو کې د وسله والو په تړاو د تورونو له کبله اړيکې سختې خرابې شوي دي او د دواړو هېوادونو ترمنځ پر سرحد خونړۍ نښتې هم رامنځته شوي دي.