Dhjetëra mijëra vetë demonstruan në marshimet e Pashkëve

Dhjetëra mijëra pjesëmarrës në marshimet e Pashkëve në më shumë se 100 vende – ky është vlerësimi i Rrjetit Bashkëpunues për Paqe. Numri i pjesëmarrësve mbeti "në të njëjtin nivel si vitin e kaluar, me një tendence të lehtë në rritje". Qendra e informacionit për Marshimin e Pashkëve raportoi mbi 120 ngjarje në të gjithë Gjermaninë.  Pjesëmarrja u rrit falë "iniciativave të reja për paqe, veçanërisht në qytetet më të vogla".

Aktivetetet e para u zhvilluan të enjten dhe të premten. E Shtuna e Madhe është tradicionalisht dita kryesore e marshimeve të Pashkëve. Megjithatë, sipas informacioneve të policisë, turmat e mëdha mbetën përjashtim.

Demonstrata më të mëdha u mbajtën përsëri të hënën, edhe në Frankfurt mbi Main dhe Hamburg, me afërsisht 1.400 dhe 1.700 pjesëmarrës, përkatësisht, sipas shifrave të policisë. Organizatorët përmendën shifra më të larta.

Pjesëmarrja më e madhe do të ishte "e dëshirueshme"

"Duke pasur parasysh situatën kritike globale, një pjesëmarrje më e madhe do të ishte e dëshirueshme", deklaroi, për shembull, Qendra e Informacionit për Marshin e Pashkëve. Ajo që ra në sy në shumë manifestime ishte mosha mesatare relativisht e lartë e demonstruesve.

Këtë e konfirmon edhe studiuesi i paqes Tobias Debiel në një intervistë për tagesschau.de. Ka disa arsye për këtë: thirrjet për demonstratat në disa raste janë shumë njëanshme – për shembull, kur Rusia nuk përmendet qartë si agresore. Dhe – ndryshe nga vitet 1980 – mungojnë figurat e shquara nga bota e kulturës, shoqërisë dhe politikës. "Stili tradicional i demonstratës me njerëz më të moshuar është më pak tërheqës për të rinjtë," tha Debiel.

Marshimet e Pashkëve të këtij viti u përqendruan në luftërat e vazhdueshme në Lindjen e Mesme dhe Ukrainë. Marshimet e Pashkëve gjithashtu kundërshtojnë shërbimin e detyrueshëm ushtarak, shpjegoi rrjeti Friedenskooperative.

Marshimet e Pashkëve janë mbajtur në Gjermani që nga vitet 1960. Ato arritën kulmin në vitet 1980, gjatë Luftës së Ftohtë, kur në to morën pjesë qindra mijëra vetë.

(tgsch)