Ngatërrim kompetencash për të drejtat e njeriut

Deri tani Bashkimi Evropian ka në Vjenë një "Zyrë Vrojtimi për Racizmin dhe Ksenofobinë". Në të ardhmen ajo planifikohet të zgjerohet në një "Agjenci për të Drejtat e Njeriut". Për detyrat e saj po diskutohet aktualisht fuqishëm; sepse këtu ka ndërhyrë Këshilli i Evropës, institucioni më i vjetër dhe më i madh evropian. Një prej detyrave më të rëndësishme të tij është mbrojtja e të drejtave të njeriut.

Thomas Hammarberg është në fakt një burrë i shpenguar: suedezi 63 vjeçar ka përvojë konfliktesh nga shumë misione humanitare jashtë vendit. Por që me marrjen e postit të të ngarkuarit për të drejtat e njeriut në Këshillin e Evropës pak javë më parë ai qëndron shpesh në zyrën e tij të re dhe acarohet para së gjithash me Brukselin dhe me Komisionin Evropian. Kjo sepse Komisioni kërkon të krijojë një agjenci evropiane për të drejtat e njeriut me seli në Vjenë. Përfundimi nuk ka sesi të jetë i mirë, mendon Hammarberg:

"Kur Bashkimi Evropian fillon tani të interesohet për të drejtat e njeriut atëherë ai nuk duhet të minojë punën e Këshillit të Evropës. Kjo do të prodhonte vetëm pasiguri në lidhje me standartet që vlejnë për të drejtat e njeriut."

Kurrsesi - thuhet në Komisionin Evropian. Agjencia e planifikuar për të drejtat e njeriut nuk është rivale në luftën për mbrojtjen e të drejtave të njeriut dhe për demokraci, përpiqet të qetësojë presidenti i Komisionit Evropian José Manuel Barroso:

"Edhe nëse Komisioni Evropian dhe Këshilli i Evropës do të thonë me raste të njëjtën gjë, kjo nuk përbën ndonjë problem, përkundrazi. Ajo duhet parë si pasurim dhe plotësim i ndërsjelltë."

Por çështja nuk është aq e thjeshtë sa ç'tingëllon. Mbrojtja e të drejtave të njeriut dhe e demokracisë është detyra më e fisme, më qendrore e Këshillit të Evropës në Strasburg. Para portave të tij janë ngritur 46 flamujtë e shteteve anëtare - të gjitha këto kanë nënshkruar konventën për mbrojtjen e të drejtave të njeriut dhe të lirive themelore. Çdo qytetar që konsideron t'i jenë shkelur të drejtat bazë mund të ngrejë padi pranë gjykatës evropiane për të drejtat e njeriut - parakusht është që të kenë shteruar mundësitë e ndjekjes së çështjes në gjykatat kombëtare. Thomas Hammarberg:

"Gjykata është pjesë e Këshillit të Evropës dhe gjykatësit atje janë ekspertë kur është fjala për rëndësinë e konventave për të drejtat e njeriut - Bashkimi Evropian duhet të respektojë edhe këtë fakt."

Cila është atëherë nevoja për një organizatë të dytë, në parim konkurruese, në Evropë? - pyet i ngarkuari për të drejtat e njeriut. Për të kontrolluar në përgjegjësi individuale respektimin e klauzolave për të drejtat e njeriut në marrëveshjet e Bashkimit Evropian, është përgjigja në Bruksel.

Por në korridoret e Këshillit të Evropës mund të dëgjosh këto ditë, se atje po harxhohen krejt pa kuptim para të taksapaguesve, qytetarët po çoroditen edhe një herë më shumë nga një institucion i ri evropian. Që tani Këshilli i Evropës lufton me faktin që opinioni e ngatërron me diçka tjetër: qoftë me Parlamentin Evropian, qoftë me Këshillin Evropian, të cilët nuk kanë të bëjnë aspak me institucionin në Strasburg. Dhe tani planifikohet edhe një agjenci e re e Bashkimit Evropian për të drejtat e njeriut.