دنیا کی طویل ترین مسافر ٹرین، سوئٹزرلینڈ میں نیا عالمی ریکارڈ

سوئٹزرلینڈ کے سب سے بڑے نجی ریلوے آپریٹر رہیٹشے باہن (رہٹین ریلوے) نے طویل ترین مسافر ٹرین کا ریکارڈ بنانے کے لیے ایک سو بوگیوں کو ایک ساتھ جوڑ کر چلایا۔ 1910 میٹر طویل اس ٹرین کو چلانے کے لیے چار انجنوں کا استعمال کیا گیا۔

اس ٹرین پر 150 مسافر سوار تھے اور اس ٹرین نے ’البولا /برنینا‘ روٹ پر پریڈا سے جنوب مشرقی سوئٹزرلینڈ میں واقع الوانوئے تک کا سفر کیا۔ تقریبا 25 کلومیٹر کا سفر طے کرنے کے لیے ایک گھنٹہ لگا۔ اس ٹرین کو خوش آمدید کہنے کے لیے راستے میں آنے والی دلکش وادیوں میں مقامی لوگ بھی کھڑے رہے۔

البولا/برنینا ریلوے لائن سوئس ریلوے کی تعمیر کے ابتدائی دنوں میں بنائی گئی تھی اور یہ یونیسکو کے عالمی ثقافتی ورثے میں بھی شامل ہے۔ یہ راستہ جنوب مشرقی سوئٹزرلینڈ سے گزرتا ہے اور 130 کلومیٹر طویل ہے۔ اسے دنیا کے سب سے شاندار ریلوے روٹس میں سے ایک سمجھا جاتا ہے۔ راستے میں یہ ٹرین 120 سال پرانے پُل سے بھی گزرتی ہے۔

اس ٹرین کو چلانے کے لیے مجموعی طور پر سات ٹرین ڈرائیوروں کی ضرورت تھی۔ ان سب کو ہمیشہ ایک ہی وقت میں ٹرین کو تیز کرنا یا بریک لگانا پڑتا تھا۔ بات چیت ممکن بنانے کے لیے سوئس فوج سے ایک کیبل کے ساتھ فیلڈ ٹیلی فون حاصل کیا گیا تھا۔ بہت زیادہ سرنگوں کی وجہ سے یہ رابطہ کاری ٹیلی فون یا موبائل کے ساتھ ممکن نہیں تھی۔

ریلوے حکام کی طرف سے جاری ہونے والے ایک بیان کے مطابق عالمی ریکارڈ کی تصدیق کرنے والے ادارے گنیز ورلڈ ریکارڈز نے پہلے ہی یہ کہہ دیا تھا کہ یہ دنیا کی طویل ترین مسافر ٹرین ہو گی۔ یہ عالمی ریکارڈ بنانے کا مقصد سوئٹزرلینڈ کی تکنیکی کامیابیوں کا جشن منانا ہے۔ سوئس ریلوے اپنی ایک 175 ویں سالگرہ منا رہی ہے۔