سپریم کورٹ کا عمران خان کے طبی معائنہ کا حکم

پاکستان کی سپریم کورٹ نے جمعرات کو حکومت کو ہدایت کی کہ جیل  میں بند عمران خان کا طبی معائنہ کرنے کے لیے ایک میڈیکل ٹیم تشکیل دی جائے۔ سابق وزیرِ اعظم نے اپنی دائیں آنکھ کی بینائی میں 85 فیصد کمی کی شکایت کی تھی۔

تہتر سالہ عمران خان بدعنوانی کے متعدد مقدمات میں 2023 سے جیل میں ہیں، جن میں 2018 سے 2022 کے دوران اپنی حکومت کے دوران دیگر ممالک سے ملنے والے قیمتی تحائف چرانے کا الزام بھی شامل ہے۔ عمران خان کے وکیل سلمان صفدر نے اسلام آباد میں میڈیا کو بتایا کہ چند ماہ قبل ان کی دائیں آنکھ میں انفیکشن ہوا تھا جس کے نتیجے میں ان کی بینائی متاثر ہوئی۔

سپریم کورٹ کے چیف جسٹس یحییٰ آفریدی نے اس ہفتے سلمان صفدر کو ہدایت دی تھی کہ وہ خان سے ملاقات کریں اور ان کی صحت کی صورتحال کی رپورٹ جمع کرائیں۔ صفدر نے جیل سیل میں خان سے تین گھنٹے طویل ملاقات کی اور جمعرات کو عدالت کو بتایا کہ ان کی دائیں آنکھ کی بینائی تیزی سے کم ہو رہی ہے۔

 کرکٹ اسٹار سے سیاستدان بننے والے عمران خان 2024 کے انتخابات میں اپنی جماعت کی ناکامی کے باوجود پاکستان میں مقبول ہیں۔

حکومت نے گزشتہ چھ ماہ کے دوران خان کی اپنے اہلِ خانہ اور وکلا سے ملاقاتوں پر پابندیاں عائد کر رکھی ہیں۔ عدالت نے حکومت کو یہ بھی حکم دیا کہ انہیں لندن میں مقیم اپنے بیٹوں سے بات کرنے کی اجازت دی جائے۔

ادارت: کشور مصطفیٰ