یورپی یونین سے 35 سال بعد کسی پرواز کی بغداد میں پہلی لینڈنگ

عراقی دارالحکومت سے موصولہ رپورٹوں کے مطابق ملکی وزارت ٹرانسپورٹ نے بتایا کہ یورپی یونین کے کسی رکن ملک کی کسی ایئر لائن کی ایک تہائی صدی سے بھی زیادہ عرصے بعد جو اولین پرواز منگل کو بغداد کے انٹرنیشنل ایئر پورٹ پر اتری، وہ یونان کی ایجیئن ایئر لائنز کی ایک فلائٹ تھی۔

عراق سے اقوامِ متحدہ مشن اور امریکی فوج کے انخلا کا آغاز، مگر بیرونی دباؤ برقرار

عراقی وزارت ٹرانسپورٹ نے ایک بیان میں کہا کہ عشروں بعد ایسی پہلی فلائٹ کا بغداد میں اترنا ''عراق کی شہری ہوابازی کے یورپی نقشے پر واپسی‘‘ کا ثبوت ہے، جو بہت خوش آئند ہے۔

ساتھ ہی اس وزارت نے کہا کہ اس یورپی فلائٹ کی بغداد میں لینڈنگ ''ایوی ایشن کے عراقی شعبے کے خوش کن بحالی کا ایک نیا مرحلہ‘‘ بھی ہے۔

یورپی یونین سے بغداد تک براہ راست فضائی رابطوں میں تعطل کب سے؟

یورپی یونین کے رکن ممالک کی فضائی کمپنیوں کی عراقی دارالحکومت بغداد تک براہ راست پروازوں کا سلسلہ سلامتی کی وجوہات کی بنا پر 1990 کی دہائی کے اوائل میں اس وقت سے بند تھا، جب طویل عرصے تک عراق پر حکومت کرنے والے صدر صدام حسین نے خلیج فارس میں عراق کی ہمسایہ عرب ریاست کویت پر فوجی حملہ کر دیا تھا۔ کویت پر یہ عراقی فوجی حملہ خلیج کی پہلی جنگ کے نتیجے میں ناکام بنایا گیا تھا۔

عراقی الیکشن، فرقہ وارانہ کشیدگی اور سابق وزیر اعظم المالکی

بعد میں 2003ء میں امریکہ کی قیادت میں عراق میں فوجی مداخلت کے نتیجے میں صدام حسین کی حکومت ختم ہو گئی تھی، مگر پھر ساتھ ہی مشرق وسطیٰ کے اس ملک میں ایک ایسی خانہ جنگی بھی شروع ہو گئی تھی، جس میں برسوں تک کئی جہادی گروہ ایک دوسرے کے خلاف برسرپیکار رہے تھے اور فرقہ وارانہ خونریزی کا ایک طویل سلسلہ برسوں تک جاری رہا تھا۔

عشروں کی بدامنی کے بعد استحکام

عراق میں صدام دور کے بعد برسوں تک جاری رہنے والی بدامنی اور خانہ جنگی کے بعد مشرق وسطیٰ کی اس ریاست میں اب کافی حد تک دوبارہ استحکام آ چکا ہے۔ ملکی حکومت کی بھی کوشش ہے کہ سلامتی کی مسلسل بہتر ہوتی ہوئی صورت حال کے ساتھ ساتھ زیادہ سے زیادہ غیر ملکی سرمایہ کاری کے ذریعے عراقی معیشت کو بھی ترقی دی جائے۔

موصل کی تاریخی النوری مسجد آٹھ سال بعد دوبارہ کھول دی گئی

یونانی دارالحکومت ایتھنز سے بغداد تک اب جو کمرشل فضائی رابطے بحال ہوئے ہیں، ان کے تحت ہر ہفتے ایتھنز سے دو پروازیں بغداد تک جایا اور آیا کریں گی۔

عراقی وزارت ٹرانسپورٹ کے مطابق اگر تجارتی طلب مزید بڑھی، تو ہر ہفتے ایتھنز سے بغداد تک دو پروازوں کے موجودہ سلسلے کو وسعت بھی دی جا سکتی ہے۔

یونان کی ایجیئن ایئر لائنز نے اسی سال ایتھنز سے عراق میں اربیل تک اپنی پروازوں کا سلسلہ بھی بحال کر دیا تھا، جو شمالی عراق میں نیم خود مختار علاقے کردستان کے دارالحکومت ہے۔

عراق: داعش کا شامی اور عراقی علاقوں کا سربراہ ہلاک

عراقی کردستان میں سلامتی کی صورت حال باقی ماندہ عراق سے کہیں بہتر ہے، جہاں اربیل تک پروازوں کی کامیاب بحالی یورپی یونین اور بغداد کے مابین براہ راست فضائی رابطوں کی بحالی کا پیش خیمہ ثابت ہوئی۔

ادارت: کشور مصطفیٰ