Федерика Могерини уапсена во Брисел поради истрага за измама

Поранешната шефица за надворешна политика на ЕУ, Федерика Могерини, е приведена во вторникот, откако полицијата изврши рации во истрага за наводна измама поврзана со обука на европски дипломати.

Могерини, која беше висок претставник за надворешни работи од 2014 до 2019 година, сега раководи со постдипломската школа „Колеџ на Европа“, чиј објект беше претресен заедно со канцелариите на дипломатската служба на ЕУ (EEAS).

52-годишната Италијанка е уапсена во Брисел заедно со заменик-раководителот на школата за обука и Стефано Санинино, висок функционер на ЕУ кој беше генерален секретар на EEAS од 2021 до 2024 година, според извор близок до случајот.

Европската канцеларија на јавниот обвинител (EPPO) соопшти дека претреси биле извршени во „Колеџ на Европа“ во белгискиот град Бриж и во просториите на Европската служба за надворешни работи во Брисел – дипломатското крило на ЕУ.

„Три лица се приведени“ во врска со рациите, како „дел од истрага за наводна измама поврзана со обука финансирана од ЕУ за млади дипломати“, се наведува во соопштението на EPPO.

Претресите, извршени од белгиската федерална полиција на барање на EPPO, ги опфатија и домовите на осомничените, соопштија обвинителите.

Според EPPO, предмет на истрагата е деветмесечна програма за обука на млади дипломати од земјите на ЕУ, позната како Европска дипломатска академија.

Програмата беше доделена од EEAS на „Колеџ на Европа“ во Белгија во периодот 2021–2022, а истрагата се фокусира на тоа дали тендерската постапка била наместена во корист на школата.

Могерини е раководителка и на „Колеџ на Европа“ и на Европската дипломатска академија.

„Постојат силни сомневања дека... доверливи информации поврзани со тековната набавка биле споделени со еден од кандидатите што учествувале на тендерот“, се наведува во соопштението на EPPO.

„Разјаснување на фактите“

Европската комисија потврди дека рациите се случиле.

„Можеме да потврдиме дека полицијата денес беше во зградите на EEAS, и ова е дел од тековната истрага за активности што се случиле во претходниот мандат“, изјави портпаролката на комисијата, Анита Хипер.

Актуелниот висок претставник за надворешни работи на ЕУ, Каја Калас, ја презеде функцијата пред една година од наследникот на Могерини, Жозеп Борел.

EPPO соопшти дека побарала и добила укинување на имунитетот на неколку осомничени пред претресите.

Ако се потврдат, обвинувањата „можат да претставуваат измама при јавни набавки, корупција, конфликт на интереси и повреда на професионална тајна“, соопшти обвинителството.

„Истрагата е во тек за да се разјаснат фактите и да се утврди дали се случиле кривични дела“, се додава.

EPPO е независна канцеларија на ЕУ, одговорна за истраги за кривични дела против финансиските интереси на Унијата.

Истрагата е поддржана и од Европската канцеларија за борба против измами (OLAF), на која првично биле пријавени обвинувањата.