اندونیزيا: جاکارتا ته څېرمه د ريلګاډي حادثې مرګ ژوبله اړولې
۱۴۰۵ اردیبهشت ۸, سهشنبه
د دوشنبې په ورځ ناوخته د اندونیزيا پلازمينې جاکارتا ته څیرمه د ریلګاډي د يوه خونړي ټکر په پېښه کې لږ تر لږه ۱۴ کسانو ژوند بایللی. دا خبر نن، سه شنبه د اندونيزيا د اورګاډو دولتي شرکت «کی ای آې» ورکړی دی.
ياد شرکت زياته کړې ده چې په دې پېښه کې نور ۸۴ کسان ټپيان شوي چې د درملنې له پاره روغتون ته انتقال شوي دي.
د تصادم په اړه نور په څه پوهيږو؟
د جاکارتا دباندې د بيکاسي تيمور په تمځای کې يو د اوږده واټن ريلګادی د يوه ولاړ اورګاډي د وروستي واګن سره ټکر شو. دغه واګڼ يوازې د ښځو له پاره ځانګړی شوی وو چې دا عمومي چاره په اندونیزيا کې د ښځو د ځورونې د مخنيوي په موخه ترسره کيږي.
اړونده موضوع: هسپانيا: په دريو ورځو کې د ريلګاډي دويمې حادثې مرګ ژوبله اړولې
د اندونیزيا د اورګاډي شرکت د وياندې انه پوربا، په حواله تلفات ټول په ولاړ ریل کې رامنځته شوي دي.
چارواکو وويل چې د آرګو برومو انشریک د اوږده واټن ريل ټول ۲۴۰ مسافرين په خوندي توګه تخليه شوي دي.
د ژغورنې عمليات روان دي
د جاکارتا د پلټنې او ژغورنې آژانس د يوې اعلامیې په خپرولو سره ويلي دي چې حادثې «د ريلګاډي يو شمیر واګنونو ته د پام وړ زيان رسولی دی».
زياته شوې ده چې يو شمیر کسان د تصادم د ځواک له کبله په واګنونو کې بند پاتې ول. د ژغورنې عملې د هغوی د ژغورلو هڅه کوله خو ډېر یې د سه شنبې پر سهار را ايستل شوي دي.
اړونده موضوع: هند: د اورګاډي ټګر له دې کبله شوی وو چې چلوونکو ېې د کریکټ لوبه لیدله
په اندونيزيا کې د ريګاډو پټليو د زړو شبکو له کبله دا ډول حادثې عامې دي. د ۲۰۲۴م کال په جنورۍ میاشت کې د جاکارتا په لویدیځ کې د دوو ريلونو په ټکر کې لږ تر لږه ۴ کسانو ژوند له لاسه ورکړی وو.