پوٹن کے گھر پر حملے کے بعد روس یوکرین امن مزاکرات خطرے میں

روس نے پیر کے روز کہا کہ صدر ولادیمیر پوٹن کی رہائش گاہ پر حملے کے بعد ماسکو جنگ سے متعلق امن مذاکرات پر اپنے موقف میں نظرثانی کرنے پر غور کر رہا ہے۔ روس نے پوٹن کی رہائش گاہ پر حملے کی ذمہ داری یوکرین پر عائد کی ہے۔ البتہ ماسکو نے اپنے دعوے کی حمایت میں کوئی ثبوت پیش نہیں کیا ہے۔

ادھر یوکرین کے صدر وولودیمیر زیلنسکی نے ان دعوؤں کی سختی سے تردید کرتے ہوئے اسے "مکمل من گھڑت" قرار دیا اور روس پر الزام لگایا کہ وہ کییف میں سرکاری عمارتوں پر حملے کے لیے زمین تیار کر رہا ہے۔

روس کے وزیر خارجہ سرگئی لاوروف نے دعویٰ کیا کہ کییف نے روس کے شمال مغربی نوگوروڈ علاقے میں واقع پوٹن کی سرکاری رہائش گاہ پر طویل فاصلے تک مار کرنے والی بغیر پائلٹ والی تقریبا 90 فضائی گاڑيوں کا استعمال کرتے ہوئے رات کے دوران حملہ کیا۔

اس دوران روس کے اپنے علاقائی عزائم پر ثابت قدم رہنے کے ارادے کی نشاندہی کرتے ہوئے، صدر پوٹن نے کہا کہ ان کے جرنیلوں کو زاپوریژیا کے تمام خطے کو محفوظ بنانے کی کوششوں کو آگے بڑھانا چاہیے۔ واضح رہے اس خطے پر ماسکو کو پہلے ہی سے تقریباً 75 فیصد کنٹرول حاصل ہے۔

حملے پر ٹرمپ کا رد عمل

امریکی صدر ڈونلڈ ٹرمپ نے اس پر اپنے پہلے رد عمل میں کہا کہ وہ اس خبر سے "بہت ناراض" ہیں۔ ان کا کہنا تھا، "مجھے یہ پسند نہیں ہے، یہ قطعی اچھی بات نہیں ہے۔"

ٹرمپ نے صحافیوں سے بات چیت میں کہا، "حملہ کرنا ایک چیز ہوتی ہے، تاہم ان کی رہائش گاہ پر حملہ کرنا ایک الگ بات ہے۔ ایسا کچھ بھی کرنے کا صحیح وقت نہیں ہے۔ اور مجھے آج صدر پوٹن سے اس کے بارے میں معلوم ہوا۔ میں اس پر بہت ناراض تھا۔"

اتوار کے روز ہی ٹرمپ نے فلوریڈا میں یوکرین کے صدر وولودیمیر زیلنسکی سے ملاقات کی تھی اور بات چیت کے بعد امریکی صدر نے کہا تھا کہ وہ جنگ کے خاتمے کے معاہدے کے "بہت قریب، شاید بہت قریب" پہنچ رہے ہیں۔

شہباز شریف کی سخت مذمت

پاکستانی وزیر اعظم شہباز شریف نے روسی صدر ولادیمیر پوٹن کی رہائش گاہ کو نشانہ بنانے سے متعلق رپورٹس کی مذمت کرتے ہوئے اسے "گھناؤنا فعل" قرار دیا۔

سول شل میڈيا ایکس پر اپنی ایک پوسٹ میں وزیر اعظم نے کہا، "پاکستان روسی فیڈریشن کے صدر ولادیمیر پوٹن کی رہائش گاہ کو مبینہ طور پر نشانہ بنانے کی مذمت کرتا ہے۔"

انہوں نے کہا کہ اس طرح کی گھناؤنی حرکت امن و سلامتی اور استحکام کے لیے سنگین خطرہ ہے، خاص طور پر ایسے وقت میں جب امن کے لیے کوششیں جاری ہیں۔

انہوں نے مزید کہا، "ہم ہر قسم کے تشدد اور سلامتی کو نقصان پہنچانے اور امن کو خطرے میں ڈالنے والی کارروائیوں کو سختی سے مسترد کرنے کا اعادہ کرتے ہیں۔"

یوکرین امریکی حمایت کے بغیر جنگ نہیں جیت سکتا، زیلنسکی

یوکرین کے صدر ولادیمیر زیلنسکی نے فوکس نیوز کو بتایا کہ یوکرین امریکی حمایت کے بغیر جنگ نہیں جیت سکتا۔

انہوں نے کہا، "کیا ہم امریکی حمایت کے بغیر جیت سکتے ہیں؟ نہیں۔" انہوں نے مزید کہا کہ مجھے پوٹن پر بھروسہ نہیں ہے اور وہ یوکرین کے لیے کامیابی نہیں چاہتے ہیں۔

اس سے قبل پیر کے روز یوکرینی صدر نے کہا کہ 20 نکاتی امن کی تجویز میں دو اہم مسائل کو حل کرنا باقی ہے۔ اس میں روس کی کنٹرول میں زیپوریزیا نیوکلیئر پاور سٹیشن کا کنٹرول اور ڈونباس کے علاقے کی قسمت شامل ہے۔

ادارت: رابعہ بگٹی