Декрет на Трамп: САД се повлекуваат од 66 организации

САД се повлекуваат од 66 меѓународни организации, агенции и комисии. Тоа произлегува од декретот на претседателот Доналд Трамп објавен од Белата куќа. Повлекувањето е оправдано со фактот дека организациите и договорите не се во согласност со интересите на САД. Меѓу организациите се Фондот за население на Обединетите нации и тела кои се занимаваат со прашања како што се климата, трудот и родовата еднаквост.

Повеќето од засегнатите институции се агенции, комисии и советодавни тела блиски до ОН, кои администрацијата на Трамп смета дека промовираат различност и таканаречени „воук“ иницијативи. Меѓу организациите кои немаат врска со ОН, и од кои САД се повлекуваат, се Партнерството за атлантска соработка, Меѓународниот институт за демократија и изборна помош и Глобалниот форум за борба против тероризмот.

„Излишни“ и „лошо управувани“ институции

Според регулативата, повлекувањето треба да се спроведе што е можно поскоро. Ова може да значи нефинансирање или прекинување на учеството. Според американскиот државен секретар Марко Рубио, администрацијата на Трамп утврдила дека засегнатите институции се, меѓу другото, „излишни“ и „лошо управувани“, дека нивните интереси не се во согласност со интересите на Соединетите Американски Држави или дека претставуваат „закана за суверенитетот, слободите и општата благосостојба на нашата нација“. Администрацијата на Трамп веќе го објави своето повлекување од Светската здравствена организација (СЗО) и од културната организација УНЕСКО на ОН.