Партиите предлагаат мерки по скокот на цените на горивата
10 март 2026
По растот на цените на горивата, сè поголеми се стравувањата дека ќе следат нови поскапувања и на струјата и на храната. Опозициските партии веќе ги презентираа своите предлози за ублажување на последиците од кризата предизвикана од воените дејствија на Блискиот Исток.
Предлози на СДСМ: Намалување на ДДВ и акцизи
Лидерот на СДСМ, Венко Филипче,на прес-конференција ја обвини власта дека не презема мерки против растот на цените. Тој предложи намалување на ДДВ за горивата од сегашните 18% на 5%, намалување на акцизата за 4 денари и воведување нула проценти ДДВ за основните прехранбени производи.
„Предлагаме намалување на стапката на ДДВ при промет на сите енергенти – дизел, безоловен бензин, гасно масло, течен нафтен гас и метан. Намалувањето на акцизата директно ќе влијае на поевтинување на горивата, а нула ДДВ за храната ќе помогне да се амортизира евентуален ценовен шок“, изјави Филипче.
Тој додаде дека цената на нафтата на светските берзи расте веќе еден месец и достигнала 60% повисоки нивоа, додека, според него, Владата не презела ниту една мерка за заштита на граѓаните.
ЛДП бара итни мерки по новото поскапување
Либерално-демократската партија реагира на последната одлука на Регулаторната комисија за енергетика (РКЕ), која донесе ново поскапување на горивата. Од партијата бараат итно намалување на акцизата за увозот на горива и воведување дополнителни мерки и субвенции.
„Не е изненадувачка одлуката на РКЕ со оглед на воените случувања во Иран и регионот. Изненадувачко е тоа што Владата повторно делува неподготвено, иако пред само десет дена уверуваа дека нема опасност“, стои во соопштението.
Реакција од ВМРО-ДПМНЕ: Мерките се веќе предложени во 2022 година
Од ВМРО-ДПМНЕ реагираа дека дел од мерките кои денес ги предлага Филипче биле предложени од нив уште во 2022 година, кога биле опозиција.
„Филипче предлага мерки кои ние ги предложивме пред години. Механизмот за намалување на акцизата (ДНА механизам) беше воведен по наш притисок“, се наведува во соопштението на партијата.
Тие потсетуваат дека истата влада на СДСМ во минатото го зголемила ДДВ за повеќе прехранбени производи, а сега бара намалување.
Регулаторната комисија за енергетика ги зголеми цените на горивата - дизелот за 14,5 денари за литар, а бензините за 5 денари за литар, додека цените на нафтата изутринава паднаа за дури 10%.