Процес: Имамоглу се сочува со затворска казна до 2430 години

Повеќе од една година, турското правосудство жестоко се пресметува со Републиканската народна партија (ЦХП). Неколку градоначалници беа уапсени, а уапсени се и стотици нивни вработени и партиски функционери.

Екрем Имамоглу, 55, поранешниот градоначалник на Истанбул и најверојатен претседателски кандидат на опозицијата, исто така, е во затвор со висока безбедност Силиври од март 2025 година. Ривалот на турскиот претседател Реџеп Таип Ердоган се соочува со голем број тужби и истраги, од наводни навреди кон јавни службеници до фалсификување документи и шпионажа, а во некои случаи тој веќе е осуден.

Денеска (9 март) започнува најголемото судење против овој политичар од ЦХП. Јавното обвинителство во Истанбул го обвинува за корупција и дека е водач на организирана криминална група.

Тоа е огромен судски процес со над 400 обвинети и обвинение од речиси 3.900 страници. Според државната новинска агенција Анадолија, доколку биде осуден - Екрем Имамоглу се соочува со 2.430 години затвор.

Политички прогон

За него и за неговата партија ЦХП, судењето е несомнено политички мотивирано - со цел да се отстрани од политиката како најопасен ривал на Ердоган пред следните претседателски избори во 2028 година.

Развојот на настаните го зајакнува ова сомневање. Кусо по неговото апсење, истражните органи ги уапсија не само неговите вработени и партиски колеги, туку и еден од браќата на неговата сопруга. Истражителите ги испрашуваа и неговиот татко и син. Им беше забрането да патуваат, па неговиот син неодамна не можеше да прифати покана од Техничкиот универзитет во Дрезден да ја посети Германија.

Потоа, на почетокот на февруари, дојде следниот удар: Уште еден од браќата на неговата сопруга беше уапсен за наводна употреба на дрога - неосновано, како што брзо се покажа, бидејќи последователниот тест за дрога беше негативен. Дилек Имамоглу остро го критикуваше тоа, опишувајќи ја истрагата како малтретирање и организирана кампања за клевета против нејзиниот сопруг и семејство. Бидејќи и провладиниот печат објавува речиси дневни извештаи за тоа колку се криминални Имамоглу, неговиот круг и неговата партија ЦХП. 

За што е обвинет Имамоглу?

Според обвинението, јавното обвинителство го товари опозицискиот политичар за повеќе од 140 кривични дела: од перење пари и измама во јавните набавки и нивно прикривање, до примање мито, ширење лажни информации и кршење на законите за шумарство, даноци и рударство. Тој, исто така, наводно е одговорен за злосторствата на другите обвинети и затоа се соочува со дополнителни затворски казни.

Според новинската агенција Анадолу, криминалната организација на Екрем Имамоглу предизвикала економска штета на државата од над 24 милиони американски долари.

Кој е Екрем Имамоглу?

Имамоглу е роден на 4 јуни 1970 година во Акчабат, западно од Трабзон, на брегот на Црното Море. Потекнува од скромно семејство кое водело продавница за алати и материјали за занаетчии, кое се преселило во Истанбул во 1987 година. Како и Ердоган, Имамоглу бил страствен фудбалер и посетувал училиште за Куран.

Како што самиот вели, ги започнал студиите на Американскиот универзитет во Северен Кипар, а подоцна се префрлил на Универзитетот во Истанбул, каде што во 1994 година се стекнал со диплома за бизнис администрација и магистрирал човечки ресурси.

Во 2008 година, тој се приклучил на Републиканската народна партија (ЦХП). Со нејзината комбинација од социјалдемократска и националистичка политика, таа стана главна опозициска партија на владејачката АКП. Политичката база на ЦХП е првенствено меѓу урбаната, секуларна, средна класа.

Политичката кариера на Имамоглу започна во истанбулскиот округ Бејлукдуз, упориште на АКП на Ердоган, каде победи како кандидат на опозицијата во 2014 година.

Четири години подоцна, тој се кандидираше за градоначалник на Истанбул и постигна неочекувана победа против десната рака на Ердоган, поранешниот премиер Бинали Јилдирим. Откако изборите беа поништени, тој ја доби кампањата за реизбор со значителна разлика. 

Неговата убедлива победа го заврши 25-годишното владеење на АКП на Ердоган во метрополата на Босфор.

Откако ја презеде функцијата, Имамоглу ги запре исплатите за фондации поврзани со АКП во вкупен износ од 55 милиони евра и го суспендираше финансирањето на провладините медиуми од средствата на градската управа. Потоа владата ги блокираше неговите проекти и одби да одобри какви било кредити на градската администрација за нејзините проекти.

На локалните избори во 2024 година, Имамоглу повторно се кандидираше како кандидат на опозицијата во Истанбул и повторно победи. Тој се смета за близок до народот и елоквентен, а се обраќа и на различни општествени групи. Неговата реторика е конструктивна: не сака да создава поделби, туку да ги вклучи сите. Тој мобилизираше милиони со својот слоган „Сè ќе биде во ред“. Благодарение на неговата популарност, тој успеа да ја охрабри својата партија да спроведе реформи.

Со сегашното раководство на партијата од реформистичкото крило, тој тргна по успешен пат. Меѓутоа, и против неговата партија ЦХП се водат неколку судски случаи.

Инаку, ЦХП побара пренос во живо од судењето кое започнува на 9 март, со цел да ѝ покаже на турската јавност дека обвинувањата против Имамоглу се неосновани. Тоа барање беше одбиено.