Украински напад во Удмуртија: погодена фабрика за оружје?

Украина, наводно, извела воздушен напад врз цели во јужноруската република Удмуртија, регион познат по развиена воена индустрија. Руските власти соопштија дека најмалку единаесет лица се повредени, но нема официјална потврда за удар врз фабрика за оружје.

Регионалниот министер за здравство, Сергеј Багин, изјави преку Телеграм дека три лица биле пренесени во болница во главниот град Ижевск. Според него, другите повредени добиле медицинска помош на лице место.

Наводно погодена фабрика во Воткинск

Неколку објави на социјалните мрежи, чии наводи не се официјално потврдени, тврдат дека во градот Воткинск бил погоден значаен воен објект кој  произведува ракети  од типот „Искандер“ и  „Орешник“.  Градот се наоѓа околу 1.400 километри од Украина.

Гувернерот Александар Бретчалов ги повика жителите да не шират непроверени информации и да останат смирени.

Според медиуми во Киев, во нападот не биле користени дронови, туку крстосувачка ракета „Фламинго“. Овие наводи, исто така, не се потврдени од официјални извори во  Русија.

Руската армија тврди дека оборила „Фламинго“ ракети и над 170 дронови

Руското Министерство за одбрана соопшти дека противвоздушната одбрана соборила пет ракети „Фламинго“ и повеќе од 170 дронови. Министерството, како и вообичаено, не даде информации за евентуалните материјални штети или точните места на пресретнување.

Нападот се случува во пресрет на годишнината од почетокот на  руската инвазија врз Украина, 24 февруари, која годинава влегува во својата петта година.  Украина  веќе четири години се бори против рускиот агресор,  а нападите зад линијата на фронтот станаа почести во последните месеци и покрај  тековните мировни преговори.