په تهران کې د ترمپ د اوربند د غځولو په اړه شکونه

ولسمشر دونالد ترمپ، اعلان کړی دی چې له ایران سره اوربند تمدیدوي څو د سولې د خبرو اترو له پاره لا ډېر وخت ورکړل شي؛ هغه ګام چې نړۍ یې په انتظار کې اچولې څو وکتل شي چې آيا تهران او اسرائيل به د څو اونيو تر جګړې وروسته چې د نړۍ بازارونو ته یې ټکان ورکړی دی، دا پريکړه ومني او که نه. 
ترمپ، وويل چې د اوربند د غځيدو په اړه یې د پاکستان غوښتنه منلې څو د ایران مشران د يوه «واحد وړاندیز» د وړاندې کولو له پاره وخت ولري.
خو په دې اړه ناډاډمنتيا ډېره ده. د چهارشنبې تر سهار پورې ایران په دې اړه کوم رسمي غبرګون نه وو ښوولې، په داسې حال کې چې په تهران کې لومړني غبرګونونه له شکه ډک ول.
د تسنيم خبري آژانس چې د سپاه پاسداران ځواک ته نږدې ګڼل کيږي، ويلي دي چې ایران د اوربند د تمديد غوښتنه نه وه کړې او خپل دا ګواښونه یې تکرار کړل چې د متحده ايالاتو سمندري محاصره به زور ماته کړي.
ایران د امريکا د سمندري ځواک له خوا په سمندر کې د ایران سوداګرۍ محاصرې ته د جګړه ایز ګام په سترګه ګوري. 
د رویترز خبري آژانس په حواله د ایران د پارلمان د مشر محمد باقر قالیباف، يوه مشاور وويل چې د ترمپ، [د اوربند د غځولو] اعلان ښايي يوه دسيسه وي، په داسې حال کې د ترمپ، لهجه او دريځ د تغیر په حال کې دي. د اوربند د غځولو يوازې څو ساعته مخکې هغه ويلي ول، دی انتظار لري چې متحده ایالات به د ایران بمبارول بیرته پيل کړي. 

د بريتانيا د پوځ د سمندري امنيت آژانس په حواله د ایران سپاه پاسداران ځواک د چهارشنبې په ورځ په هرمز تنګي کې پر يوې کارګو کښتۍ ډزې کړي دي. 
د بريتانيا د سمندري تجارت ادارې (يو کی ام ټي او) ويلي دي چې دا بريد د عمان شمال ختيځ ساحل ته څيرمه د هرمز په تنګي کې شا او خوا څلور بجې د شپې شوی دی. 
زياته شوې چې بريد کښتۍ زيانمنه کړې خو تلفات یې نه دي اړولي.  
دغې ادارې زیاته کړې ده: «د یوې کارګو کښتۍ کپتان رپوټ ورکړی دی چې د سپاه پاسداران يوه وسله واله کښتۍ دغې بيړۍ ته رسېدلې وه .... او بیا یې پر بيړۍ ډزې وکړې چې د [کښتۍ] پله ته یې ډېر زيان ورساوه. کومه اورلګېدنه او چاپیريالي اغیزه نه ده رپوټ شوې.»
ایران په سملاسي توګه د پېښې په اړه کومه تبصره نه ده کړې. دا په داسې حال کې ده چې امریکا په دې وروستیو کې په سيمه کې د ترينګلتياو په ترڅ کې له ایران سره تړاو لرونکې د يوې کښتۍ مخه نيولې وه او بريد یې پرې کړی وو.

د پاکستان لومړي وزير شهباز شريف، د دغه هېواد په غوښتنه له ایران سره د اوربند د غځولو له کبله له ولسمشر دونالد ترمپ، څخه مننه کړې ده. 
شريف، د ټولنیزو رسنیو د ايکس شبکې له لارې وويل: «زه په صادقانه توګه هیله مند یم چې دواړه غاړې به اوربند ته دوام ورکړي او د شخړې دایمي پای له پاره په اسلام آباد کې د خبرو اترو په دويم پلان شوي پړاو کې د سولې يوه هر اړخیز تړون ته د رسېدو جوګه واوسي.»

نوموړي هوډ څرګند کړ چې حکومت به یې د خبرو اترو له لارې د دې شخړې د هواري له پاره خپلو «جدي هڅو» ته دوام ورکړي. 

د امريکا متحده ایالاتو ولسمشر دونالد ترمپ، د خپلې ټولنیزې شبکې «تروت سوشل» په يوه پوست کې ويلي دي چې اوربند تر هغه غځوي چې ایران يوه طرحه وړاندې کړي او خبرې اترې کومې پایلې ته ورسيږي. 
نوموړي وويل چې دا پريکړه یې د پاکستان په غوښتنه کړې ده څو د ایران مشرانو ته پر يوه «واحد وړاندیز» د سلا کيدو وخت ورکړل شي. 
ترمپ، زياته کړې چې ده «پوځ ته د کلابندۍ د دوام لارښوونه کړې، او له هر اړخه چمتو او توانمند بايد واوسي. له همدې کبله تر هغه چې دوی [د ایران حکومت] وړاندیز يا طرحه نه وي وړاندې کړي او خبرې اترې کومې نتيجې ته نه وي رسيدلي، په هر شکل چې وي، اوربند ته ادامه ورکوو.«  
ولسمشر خپله دا پريکړه په داسې حال کې اعلان کړه چې سپينې ماڼۍ د خبرو اترو د دويم پړاو له پاره اسلام آباد ته د ولسمشر د مرستيال جی ډي وينس، سفر چې انتظار یې کیده، ځنډولی، ځکه تهران د اوس له پاره له نورو خبرو اترو ډډه کوي.