ٹرمپ نے آبنائے ہرمز کھولنے کے لیے 48 گھنٹوں کی مہلت دے دی

ایران کی فوج نے اتوار کو دھمکی دی ہے کہ اگر امریکی صدر ڈونلڈ ٹرمپ نے ایرانی پاور پلانٹس کو نشانہ بنانے کی اپنی دھمکی پر عمل کیا تو آبنائے ہرمز کو مکمل طور پر بند کر دیا جائے گا۔

ایرانی فوج کے آپریشنل کمانڈ خاتم الانبیاء نے سرکاری ٹی وی کے ذریعے جاری بیان میں کہا، "اگر ایران کے پاور پلانٹس کے حوالے سے امریکہ کی دھمکیوں پر عمل کیا گیا تو آبنائے ہرمز کو مکمل طور پر بند کر دیا جائے گا اور یہ اس وقت تک نہیں کھلے گی جب تک ہمارے تباہ شدہ پاور پلانٹس دوبارہ تعمیر نہیں ہو جاتے۔"

ایران پہلے ہی اس اہم آبی گزرگاہ میں جہازرانی کو تقریباً روک چکا ہے، تاہم ایک تجزیاتی ادارے کے مطابق جنگ سے پہلے کے مقابلے میں تقریباً صرف 5 فیصد جہاز اب بھی اس راستے سے گزر رہے ہیں۔

 

ایرانی پارلیمنٹ کے اسپیکر محمد باقر قالیباف نے اتوار کو کہا ہے کہ اگر ایرانی پاور پلانٹس کو نشانہ بنایا گیا تو مشرق وسطیٰ میں اہم بنیادی ڈھانچے اور توانائی کی تنصیبات "ناقابلِ تلافی نقصان" کا شکار ہو سکتی ہیں۔

یہ بیان امریکی صدر ڈونلڈ ٹرمپ کی اس دھمکی کے بعد سامنے آیا ہے کہ اگر آبنائے ہرمز 48 گھنٹوں میں "مکمل طور پر کھلا" نہ ہوا تو ایران کے پاور پلانٹس کو نشانہ بنایا جائے گا۔

قالیباف نے کہا کہ اگر ایران کی تنصیبات پر حملہ ہوا تو خطے کی بنیادی ڈھانچے کو "جائز اہداف" سمجھا جائے گا اور ایران کی جوابی کارروائی کے نتیجے میں تیل کی قیمتیں وقتی طور پر بڑھ سکتی ہیں۔
 

اسرائیلی فوج نے اتوار کو کہا ہے کہ ایران نے مشرق وسطیٰ کی جنگ کے آغاز کے بعد سے 400 سے زائد بیلسٹک میزائل اسرائیل کی جانب داغے، جن میں سے تقریباً 92 فیصد کو فضائی دفاع نے کامیابی سے روکا۔

اسرائیلی فوج کے ترجمان لیفٹیننٹ کرنل ناداو شوشانی نے صحافیوں کو بتایا، "ایران نے 400 سے زائد بیلسٹک میزائل فائر کیے۔ ہمارے انٹرسیپشن کے نتائج بہت اچھے رہے، تقریباً 92 فیصد میزائل کامیابی سے روکے گئے۔"

 ہفتے کے روز ایران کے میزائل دو اسرائیلی جنوبی شہروں پر داغے گئے، جن میں تقریباً 175 افراد کو طبی امداد درکار ہوئی۔

 

کیتھولک مسیحیوں کے روحانی پیشوا پوپ لیو نے اتوار کے روز کہا ہے کہ مشرق وسطیٰ میں جاری جنگ کے باعث ہونے والا درد، ہلاکتیں اور انسانی تکالیف "تمام انسانیت کے لیے ایک اسکینڈل" ہیں۔

انہوں نے سینٹ پیٹرز اسکوائر میں ہفتہ وار اینجلس دعا کے دوران کہا، "ہم اتنے لوگوں کی تکلیف، ان بے دفاع متاثرین کے دکھ کے سامنے خاموش نہیں رہ سکتے۔ جو انہیں تکلیف پہنچتی ہے وہ پوری انسانیت کو متاثر کرتی ہے۔"

امریکہ سے تعلق رکھنے والے پہلے پوپ نے مشرق وسطیٰ اور دیگر خطوں میں جاری تنازعات پر گہری تشویش کا اظہار کیا جو "جنگ اور تشدد سے تباہ ہو رہے ہیں"۔

انہوں نے اپنی اپیل میں کہا، "ہم دعا جاری رکھیں تاکہ دشمنی ختم ہو اور بالآخر امن کی راہ ہموار ہو سکے۔"

امریکہ اور اسرائیل کی جانب سے 28 فروری کو شروع کی گئی جنگ کے بعد اب تک 2,000 سے زائد افراد ہلاک ہو چکے ہیں۔
 

عالمی ادارہ صحت (ڈبلیو ایچ او) نے اتوار کو خبردار کیا ہے کہ مشرق وسطیٰ کی جنگ ایک "خطرناک مرحلے" میں داخل ہو گئی ہے کیونکہ ایران اور اسرائیل کے جوہری تنصیبات پر حملے ہو رہے ہیں اور اس نے تمام فریقین سے زیادہ سے زیادہ ضبط و تحمل اختیار کرنے کی اپیل کی ہے۔

ڈبلیو ایچ او کے سربراہ ٹیڈروس ادہانوم گبریاسس نے ایکس پر کہا، ’’جوہری مقامات کو نشانہ بنانے والے حملے عوامی صحت اور ماحولیاتی تحفظ کے لیے بڑھتا ہوا خطرہ پیدا کرتے ہیں۔ میں تمام فریقین سے فوری طور پر زیادہ سے زیادہ فوجی ضبط و تحمل اختیار کرنے اور کسی بھی ایسی کارروائی سے اجتناب کرنے کی درخواست کرتا ہوں جو جوہری حادثات کو جنم دے سکتی ہے۔‘‘

قطر اور ترکی نے اتوار کو کہا ہے کہ قطر کے علاقائی پانیوں میں ایک ہیلی کاپٹر گرنے کے نتیجے میں سات افراد ہلاک ہو گئے۔

قطر اور ترکی کی دفاعی وزارتوں نے بتایا کہ ہیلی کاپٹر معمول کی ڈیوٹی کے دوران ’’فنی خرابی‘‘ کا شکار ہوا۔ ہلاک ہونے والوں میں چار قطر کے مسلح افواج کے اہلکار، ایک قطر اور ترکی مشترکہ فورس کا اہلکار اور دو تکنیکی عملے کے ارکان شامل تھے۔

ترکی کی وزارتِ دفاع نے کہا، ’’جمہوریہ ترکی اور ریاست قطرکے درمیان فوجی تعاون اور ہم آہنگی کی سرگرمیاں موجودہ معاہدوں اور منصوبوں کے تحت بغیر کسی رکاوٹ کے جاری ہیں۔‘‘

 ایران نے کہا ہے کہ آبنائے ہرمز تمام جہازوں کے لیے کھلی ہے، تاہم "ایران کے دشمنوں" سے منسلک بحری جہازوں کو گزرنے کی اجازت نہیں دی جائے گی۔

ایرانی میڈیا کے مطابق اقوام متحدہ کی بحری ایجنسی میں ایران کے نمائندے علی موسوی نے کہا کہ تہران ایسے جہازوں کو گزرنے کی اجازت دے گا، جو ایران کے مخالف ممالک سے وابستہ نہ ہوں، بشرطیکہ وہ سکیورٹی اور حفاظتی انتظامات کے لیے ایرانی حکام سے رابطہ کریں۔

امریکہ اور اسرائیل کے ساتھ جاری جنگ کے دوران ایرانی حملوں کے خدشات کے باعث اس اہم آبی گزرگاہ سے زیادہ تر جہازرانی متاثر ہوئی ہے۔ دنیا میں تیل اور مائع قدرتی گیس ایل این جی کی مجموعی ضروریات کے تقریباً پانچویں حصے کی ترسیل آبنائے ہرمز کے ذریعے ہوتی ہے، جس سے عالمی توانائی بحران کا خطرہ بڑھ گیا ہے۔

علی موسوی نے کہا کہ ایران عالمی بحری تنظیم (انٹرنیشنل میری ٹائم آرگنائزیشن) کے ساتھ تعاون کے لیے تیار ہے تاکہ خلیج میں جہازرانی کے تحفظ کو یقینی بنایا جا سکے۔انہوں نے کہا، "سفارتکاری ایران کی ترجیح ہے، تاہم جارحیت کا مکمل خاتمہ اور باہمی اعتماد کا قیام زیادہ اہم ہے۔"

ان کے مطابق موجودہ صورتحال کی بنیادی وجہ ایران کے خلاف اسرائیل اور امریکہ کے حملے ہیں۔
 

 

اسرائیل کے وزیر دفاع اسرائیل کاٹز نے اتوار کو کہا کہ انہوں نے وزیرِ اعظم بینجمن نیتن یاہو کے ساتھ مل کر فوج کو ہدایت دی ہے کہ لبنان کے "فرنٹ لائن پر واقع دیہات" میں موجود گھروں کو تیزی سے تباہ کیا جائے تاکہ اسرائیلی بستیوں کو لاحق خطرات ختم کیے جا سکیں۔

کاٹز نے بیان میں کہا کہ فوج کو فوری طور پر لبنان میں دریائے لیتطانی پر موجود تمام پل بھی تباہ کرنے کی ہدایت دی گئی ہے، کیونکہ وہ "دہشت گردانہ سرگرمیوں" کے لیے استعمال ہو رہے ہیں۔
 

ایران کے وزیر توانائی عباس علی آبادی نے کہا ہے کہ امریکی اور اسرائیلی حملوں کے نتیجے میں ملک کے اہم پانی اور توانائی کے نظام کو بھاری نقصان پہنچا ہے۔
علی آبادی کے مطابق، "امریکہ اور صہیونی ریاست کے دہشت گردانہ اور سائبر حملوں کے نتیجے میں ملک کے اہم پانی اور بجلی کے نظام کو شدید نقصان پہنچا۔"

انہوں نے کہا کہ حملوں میں پانی کی ترسیل اور فلٹریشن کی متعدد تنصیبات نشانہ بنی اور اہم پانی کی فراہمی کے نیٹ ورک کے حصے تباہ ہوئے، تاہم نقصان کی مرمت کے لیے کام جاری ہے۔

اتوار کو صدر ڈونلڈ ٹرمپ نے ایران کے پاور پلانٹس کو نشانہ بنانے کی دھمکی دی تھی اگر ایران نے آبنائے ہرمز کو 48 گھنٹوں میں نہ کھولا۔ اس اہم آبی گزرگاہ کے ذریعے دنیا کے تقریباً 20 فیصد خام تیل اور ایل این جی کی ترسیل ہوتی ہے، جو جنگ کے آغاز سے تقریباً رک گئی ہے۔ ایرانی افواج نے متعدد بحری جہازوں پر حملے کیے ہیں، کیونکہ ان جہازوں نے ایران کی جانب سے جاری "انتباہات" کی پرواہ نہیں کی۔

حالیہ دنوں میں ایران نے دوست ممالک کے کچھ جہازوں کو گزرنے کی اجازت دی ہے، جبکہ ان ممالک کے جہازوں کو روکنے کی دھمکی دی ہے جو اس کے بقول "جارحیت" میں شامل ہیں۔ ٹرمپ کی دھمکی کے جواب میں ایران نے خطے میں توانائی اور ڈی سیلینیشن پلانٹس کو نشانہ بنانے کی دھمکی بھی دی ہے۔

 قطر نے اتوار کے روز کہا ہے کہ اس کے علاقائی پانیوں میں ایک ہیلی کاپٹر کو پیش آنے والے حادثے میں چھ افراد ہلاک ہو گئے۔

قطری وزارتِ داخلہ کے مطابق لاپتہ آخری شخص کی تلاش کے لیے امدادی کارروائیاں جاری ہیں۔ حکام نے ہلاک ہونے والوں کی قومیت یا یہ نہیں بتایا کہ وہ شہری تھے یا فوجی اہلکار۔

اس سے قبل قطر کی وزارتِ دفاع نے سوشل میڈیا پلیٹ فارم ایکس پر جاری بیان میں کہا تھا کہ ہیلی کاپٹر معمول کی ڈیوٹی کے دوران "فنی خرابی" کا شکار ہوا۔

مشرق وسطیٰ میں جاری جنگ کے آغاز کے بعد قطر پر کئی حملے ہو چکے ہیں، تاہم اس ہیلی کاپٹر حادثے کو امریکہ-اسرائیل کی جانب سے ایران پر کیے گئے حملوں سے منسلک نہیں کیا گیا۔
 

اسرائیل کے ہنگامی امداد کے اداروں نے بتایا ہے کہ اتوار کے روز لبنان سے داغے گئے راکٹ کے نتیجے میں شمالی سرحد کے قریب ایک شخص ہلاک ہو گیا۔ یہ دو مارچ سے حزب اللہ کے ساتھ شروع ہونے والی جھڑپوں کے بعد لبنان کی جانب سے کی گئی فائرنگ میں پہلی اسرائیلی ہلاکت ہے۔
ایران نواز لبنانی مسلح گروپ حزب اللہ نے ہفتے کے روز ایک بیان میں کہا کہ اس نے شمالی اسرائیل میں اسرائیلی فوجیوں کو نشانہ بنایا ہے۔

اسرائیل کے زاکا 360 ایمرجنسی ریسپانس یونٹ کے مطابق ایک گاڑی کو نشانہ بنانے والے راکٹ حملے کے بعد ایک شخص کو مردہ قرار دیا گیا۔ مقامی فائر فائٹرز نے بتایا کہ "براہ راست حملے" کے نتیجے میں دو گاڑیاں آگ کی لپیٹ میں آ گئیں۔ اسرائیلی ایمرجنسی سروس میگن ڈیوڈ آدوم کے طبی عملے نے بتایا، "ہم جائے وقوعہ پر پہنچے تو دو گاڑیاں جل رہی تھیں۔ آگ بجھانے کے دوران ہمیں ڈرائیور سیٹ پر ایک شخص ملا۔"

انہوں نے کہا، "ہم نے طبی معائنہ کیا، اس میں زندگی کی کوئی علامت نہیں تھی اور ہمیں اسے مردہ قرار دینا پڑا۔" اسرائیلی فوج نے اس سے قبل کہا تھا کہ اس نے شمالی سرحد کے قریب ایک بستی کی طرف لبنان سے راکٹ فائر ہونے کا پتہ لگایا ہے۔
 

 ایران نے خبردار کیا ہے کہ اگر اس کی توانائی کی تنصیبات کو نشانہ بنایا گیا تو وہ خطے میں امریکی توانائی اور ڈی سیلینیشن (سمندری پانی کو قابلِ استعمال بنانے والی) تنصیبات پر حملے کرے گا۔

یہ انتباہ امریکی صدر ڈونلڈ ٹرمپ کی اس دھمکی کے بعد سامنے آیا ہے جس میں انہوں نے کہا تھا کہ اگر آبنائے ہرمز کو نہ کھولا گیا تو امریکہ ایران کے پاور پلانٹس کو نشانہ بنا سکتا ہے۔ ایران کی جانب سے ٹینکروں پر حملوں کی دھمکی کے باعث اس اہم آبی گزرگاہ میں جہاز رانی بڑی حد تک معطل ہو چکی ہے۔

ایرانی فوج کی آپریشنل کمانڈ خاتم الانبیاء نے فارس خبر رساں ادارے کے ذریعے جاری بیان میں کہا، "اگر دشمن ایران کے ایندھن اور توانائی کے ڈھانچے کو نشانہ بناتا ہے تو خطے میں امریکہ اور اس کے اتحادیوں کی تمام توانائی، انفارمیشن ٹیکنالوجی اور ڈی سیلینیشن تنصیبات کو ہدف بنایا جائے گا۔"

ڈی سیلینیشن پلانٹس خلیجی ممالک کے لیے انتہائی اہم تنصیبات ہیں، جو پینے کے پانی کے ساتھ ساتھ زرعی اور صنعتی استعمال کے لیے بھی ضروری تازہ پانی فراہم کرتے ہیں، اور یہ تنصیبات پہلے ہی ایرانی حملوں کی زد میں آ چکی ہیں۔

امریکی صدرڈونلڈ ٹرمپ نے ایران کی جانب سے آبنائے ہرمز کی بندش پر شدید برہمی کا اظہار کرتے ہوئے دھمکی دی ہے کہ اگر 48 گھنٹوں کے اندر اس اہم آبی گزرگاہ کو مکمل طور پر نہ کھولا گیا تو امریکہ ایران کے پاور پلانٹس کو تباہ کر دے گا۔

ٹرمپ نے اپنے سوشل میڈیا پلیٹ فارم ٹروتھ سوشل پر لکھا، "اگر ایران نے اس وقت سے اگلے 48 گھنٹوں کے اندر آبنائے ہرمز کو مکمل طور پر اور بغیر کسی خطرے کے نہ کھولا تو امریکہ ایران کے مختلف پاور پلانٹس کو نشانہ بنا کر تباہ کر دے گا، جس کا آغاز سب سے بڑے پلانٹ سے کیا جائے گا۔"

ایران نے جاری امریکی-اسرائیلی فوجی کارروائیوں کے ردعمل میں خبردار کیا ہے کہ وہ آبنائے ہرمز سے گزرنے والے کسی بھی جہاز کو نشانہ بنا سکتا ہے، جس کے باعث اس اہم بحری راستے پر زیادہ تر جہاز رانی تقریباً معطل ہو چکی ہے۔

دنیا بھر کے تیل کی تقریباً پانچویں حصے کی ترسیل معمول کے مطابق اسی آبی گزرگاہ سے ہوتی ہے۔

ٹرمپ کا یہ سخت بیان ایک روز بعد سامنے آیا ہے جب انہوں نے وائٹ ہاؤس میں صحافیوں سے گفتگو کرتے ہوئے کہا تھا کہ وہ ایران کے خلاف فوجی کارروائی کو "کم کرنے" پر غور کر رہے ہیں۔

ادارت: رابعہ بگٹی