چینی مندوب پاکستان اور افغانستان کے درمیان جنگ بندی مشن پر

چین نے پیر کے روز کہا ہے کہ اس کے خصوصی ایلچی یوشیاویونگ پاکستان اور افغانستان کے درمیان حالیہ سرحدی جھڑپوں کے بعد کشیدگی کم کرنے کے لیے سفارتی کوششوں میں مصروف ہیں۔چین نے فریقین سے فوری جنگ بندی کی اپیل کی۔

چینی وزارت خارجہ کے ترجمان لن جیان نے ایک پریس بریفنگ میں بتایا کہ بیجنگ افغانستان اور پاکستان کے درمیان تنازعے کو اپنے سفارتی ذرائع کے ذریعے حل کرنے کی کوششیں کر رہا ہے۔

وزارت خارجہ کے مطابق افغانستان کے امور کے لیے چین کے خصوصی ایلچی یوشیاویونگ نے سات سے چودہ مارچ کے درمیان دونوں ممالک کا دورہ کیا اور اعلیٰ حکام سے ملاقاتیں کیں۔ افغانستان میں انہوں نے وزیر خارجہ امیر خان متقی اور وزیر تجارت و صنعت سے ملاقات کی جبکہ پاکستان میں انہوں نے سیکرٹری خارجہ آمنہ بلوچ سمیت دیگر اعلیٰ حکام سے بات چیت کی۔ چینی وزارت خارجہ کے بیان کے مطابق ایلچی نے دونوں ممالک پر زور دیا کہ وہ تحمل اور ضبط کا مظاہرہ کریں، فوری جنگ بندی کریں اور اپنے اختلافات مذاکرات کے ذریعے حل کریں۔

سرحدی کشیدگی میں اضافہ

پاکستان اور افغانستان کے تعلقات گزشتہ چند ماہ سے کشیدہ ہیں۔ اسلام آباد کا الزام ہے کہ افغانستان میں تحریک طالبان پاکستان (ٹی ٹی پی) اور داعش کے مقامی گروہ کے جنگجوؤں نے پناہ لے رہے ہیں، جو پاکستان میں حملوں کی ذمہ داری قبول کرتے ہیں۔ افغان طالبان حکومت ان الزامات کی تردید کرتی ہے۔

دونوں پڑوسی ممالک کے مابین کشیدگی میں حالیہ اضافہ 26 فروری کو اس وقت ہوا جب افغانستان نے پاکستان کے فضائی حملوں کے جواب میں سرحدی کارروائی کی۔ اس کے بعد پاکستان نے طالبان حکومت کے خلاف کھلی جنگ کا اعلان کرتے ہوئے اگلے ہی دن کابل پر بمباری کی۔

چین کا کردار

پاکستان چین کا خطے میں قریبی اتحادی ہے جبکہ چین افغانستان کو بھی اپنا دوست ہمسایہ ملک قرار دیتا ہے۔ چین نے پاکستان میں بیلٹ اینڈ روڈ منصوبے کے تحت اربوں ڈالر کی سرمایہ کاری کر رکھی ہے، جس میں توانائی، سڑکوں اور بنیادی ڈھانچے کے بڑے منصوبے شامل ہیں۔ تجزیہ کاروں کے مطابق 2021 میں طالبان کے اقتدار میں آنے کے بعد چین افغانستان کے لیے بھی ایک اہم اقتصادی اور سفارتی شراکت دار بن گیا ہے۔ چینی وزیر خارجہ وانگ یی نے جمعہ کو اپنے ہم افغان ہم منصب امیر خان متقی سے ٹیلیفون پر گفتگو میں کہا کہ طاقت کا استعمال صورتحال کو مزید پیچیدہ بنا سکتا ہے اور علاقائی امن و استحکام کے لیے خطرہ بن سکتا ہے۔