په تهران کې د «نفتو باران» په اړه خبرداری„ کور کې پاتې شئ“
۱۴۰۴ اسفند ۱۷, یکشنبه
د «سي ان ان» شبکې خبریال فریدریک پلیتګن، چې اوسمهال په تهران کې دی په ایکس ټولنیزه شبکه کې د یوې ویډیو په خپرولو سره له دې باران څخه د «نفتو باران» په نوم یادونه کړې ده.
د رپوټونو په حواله د شهران د نفتو په زیرمه کې وروسته له څو ساعتونو څخه هم د اور لمبې پورته کیږي.
د ایران سرې میاشتې سازمان د یوې اعلامیې په خپرولو سره ویلي چې د نفتو په زیرمو کې د چادونو په سبب د«په پراخه پيمان د هایدرو کاربن، اکسایدونو او نایتروجنو زهرجن ترکیبات فضا او وریځو ته داخل شوي دي چې د ورښت په صورت کې به ډیر خطرناک او تیزابي باران رامنځته کړي.»
په دې اعلامیه کې د تهران له اوسیدونکو څخه غوښتل شوي چې په خپلو کورونو کې دننه پاتې شي، ټول منفذونه یا سوري دې په لمندو ټوکرو بند کړي او پر تیزابي باران د جامو ککړیدو په صورت کې دې بې له ځنډه هغه بدلې کړي او په داسې کڅوړه کې دې واچوي چې خوله یې وتړل شي.
د چاپیریال ساتنې سازمان هم په یوه خبرپاڼه کې له خلکو غوښتي دي چې د امکان تر حده دې پرانیستې فضا ته له وتلو څخه ډډه وکړي. د تهران ښاروال په یوه تلویزوني پروګرام کې له خلکو وغوښتل چې له N90 یا N95 فلتر لرونکو ماسکونو څخه استفاده وکړي.
د هوا پيژندنې د وړاندېنې مرکز مشر صادف ضیایان هم د تهران په اسمان کې د «وریځو او لوګي ترکیب» تایید کړی او ویلې یې دي هغه سیمې چې د اورلګېدنې ساحو ته نزدې دي، د هوا ککړتیا په کې ډیره احساسیږي.
اړونده مطالب: د ایران جګړه: ولي روسیه د ایران مرستي ته نه وردانګي؟
آلمان، بریتانیا او فرانسې د منځني ختيځ پر هېوادونو د ایران بریدونه وغندل
د لندن په کینګز کالج کې د سرطاني ناروغیو څیړونکي داکتر شهرام کردستي، په ټولنیزو شبکو کې په یوه پيغام کې د سپارښتونو په خپرولو سره خبرداری ورکړی دی چې د نفتو په زیرمو کې انفجارونه په لنډمهال کې د مزمنو تنفسي ناروغیو، خو په اوږدمهال کې حتی د سرطان په څیر ناروغیو د اخته کیدو سبب کیدلی شي.
نوموړي ټینګار وکړ چې د یکشنبې ورځې باران یوازې په فضا کې معلق یا په اصطلاح زوړند ذرات راکموي، خو پر زهرجنو ګازونو به چندان تاثیر ونه لري او په دغو شرایطو کې پخپله د باران اوبه ډیرې ککړې دي.